Ribeiro en Común vén de presentar este luns unha moción na que pide que o Concello de Carballiño paralice a suba da taxa da auga prevista para 2025, que, según esta formación política está xerando importantes protestas e malestar entre os veciños. Este grupo da oposición subliña que “o goberno local pretende esconder a súa responsabilidade detrás da empresa concesionaria, pero o único responsable da subida é o goberno, como se demostra nas actas das xuntas de goberno, e en que é competencia do goberno local exclusivamente o de aprobar o listado cobratorio da taxa do subministro de auga e saneamento”.
Así, a xunta de goberno correspondente ao mes de abril vén de establecer o periodo cobratorio 2025 do 1º trimestre entre o 7 de abril e o 15 de xuño, para que os veciños realicen este pago, e, según Ribeiro en Común, “o malestar veciñal reside en que hai unha subida exponencial, que no caso dalgúns fogares e negocios significa o dobre da taxa 2024, suba que non obedece a un aumento en investimentos na rede nin a unha mellora no servizo municipal”.
Por outra banda, o grupo de Ribeiro en Común lembra que “recentemente, o goberno local do PP vén de subir de maneira abusiva tamén outra taxa de competencia municipal, a do servizo de recollida de lixo que, aínda que xestiona a Deputación, é titularidade e responsabilidade directa do Concello de Ribadavia”. Engaden que “no Pleno de xuño do 2024 xa o advertíamos, cando denunciabamos e rexeitabamos o cambio de ordenanza que fixo o goberno, e que supón agora a subida das taxas deste servizo, ás que se veñen unir as de Axuda no Fogar (SAF) e de Xantar na Casa, e que acaban por gravar aos fogares máis vulnerables”.
Dende Ribeiro en Común aseguran que “Non é unha escusa crible que a subida obedece a que a factura integra agora o servizo de “sumidoiros-alcantarillado”, e que este xa non se calcula en función do valor catastral e si do consumo. A realidade é que este formato de cobro foi decisión plenaria aprobada pola maioría absoluta do goberno do PP en solitario”, e que xa advertiran das repercusións desta decisión no pleno da Corporación.
Por todo isto, Ribeiro en Común pide na súa moción que o Concello paralice este novo “taxazo” e aprobe unha taxa municipal da auga cunha subida que sexa proporcional, moderada e progresiva para os fogares e negocios, para destinala a investimentos na rede e repercutindo na mellora do servizo que presta o Concello.
