A Deputación de Ourense aprobou hoxe, no pleno ordinario de abril, tres modificacións de crédito por importe de 41,5 millóns de euros que facilitarán o financiamento, por parte da institución provincial, de máis de 200 accións en cooperación cos concellos e a colaboración con máis dun cento de iniciativas de asociacións de todos os ámbitos da provincia, así como servizos, plans, programas e liñas de colaboración da Deputación ourensá con outras administracións.
A inxección de recursos aprobada hoxe divídese en 24,7 millóns para a prestación dos servizos e programas da Deputación de Ourense; 9,6 millóns, para cooperación cos concellos; e 7,1 millóns para colaboración con entidades e mancomunidades. Entre estas axudas, destacan a asignación de 50.000 euros para cada un dos Conservatorios de Música do Carballiño e Ribadavia, así como a dotación doutros 80.000 euros, repartidos equitativamente, para os Grupos de Emerxencias Supramunicipais (GES) de Avión e da capital do Ribeiro.
Asemade, no reparto destas cantidades a Deputación Provincial de Ourense tamén se destinan 165.000 euros ao Concello de Cenlle e outros 100.000 ao de Maside para a construcción de novos campos de fútbol.
Finalmente, a Corporación provincial posicionouse a favor dunha iniciativa sobre a explotación dos recursos naturais e minerais en Ourense, na que se esixe á Xunta de Galicia e ao Goberno central que a declaración de proxectos estratéxicos como o de Doade ou do Cenza leven aparelladas a posta en marcha de iniciativas empresariais e desenvolvemento rural en comarcas afectadas, co obxectivo de que teñan un impacto positivo sobre a comunidade local a explotación e posta en valor dos recursos naturais.
Tamén se solicita á Xunta de Galicia a que promova unha estratexia no desenvolvemento da minaría, a fin de que sexa sostible nas comarcas afectadas, partindo da declaración das materias primas esenciais como bens estratéxicos sometidos a control e aproveitamento público; e a modificación lexislativa para que nos proxectos mineiros haxa unha participación pública mínima do 20 %. Demándase tamén seguridade plena no aspecto medioambiental na fase construtiva e de explotación, con informes periódicos de situación, analíticas das augas e da afectación á flora e fauna.
