A Concelleira Rhut Reza sinala que “a empresa demora constantemente as altas no servizo e todo diante da pasividade e inacción do Goberno Jácome”. O BNG denuncia que a empresa mellor puntuada no proceso de licitación do Servizo actualmente en trámite, Clece SA, “é a mesma que presta o servizo na actualidade pero con outro nome”
Ourense, 27 de abril de 2025. A concesión do Servizo de Axuda no Fogar (SAF) do Concello de Ourense atópase neste momento, como tantos outros, xa en período de prórroga e a espera de ser renovado. Dito proceso de licitación atópase xa na última fase do proceso mais o certo é que, a día de hoxe, son constantes os incumprimentos de contrato por parte da empresa actualmente prestadora do Servizo, Samaín Servizos á comunidade S.A.
A Concelleira do Grupo municipal do BNG Rhut Reza, denuncia que “esta empresa demora constantemente as altas no servizo moi por riba do tempo establecido e faino diante da pasividade do Goberno Local” e engade, “esta empresa leva incumprindo o contrato desde finais do ano 2022 motivo polo que en 2023 se lle abriu un expediente de penalización por até cinco infraccións graves”.
Segundo Rhut Reza “a día de hoxe a concesionaria segue incumprindo pero parece que ao Goberno Jácome pouco lle importa xa que na nova adxudicación, a empresa proposta é Clece S.A. a mesma que presta o servizo na actualidade pero con distinta denominación”.
Desde o BNG denuncian ademais que no procedemento de adxudicación producíronse situacións “que cheiran mal” xa que, tal e como din “ordenouse modificar o informe técnico inicial, modificando as puntuacións sen ningún tipo de explicación e resultando adxudicataria a mesma empresa, con distinto nome, que leva tres anos incumprindo gravemente o contrato”.
Para a formación nacionalista “as persoas usuarias do SAF do Concello de Ourense non merecen este trato por parte dun Executivo Local que mira cara outro lado e vai permitir que a mesma empresa que leva tres anos incumprindo o contrato, volva facerse co mesmo”.
