Ribadavia prepara unha intensa axenda de actividades con motivo do Día das Letras Galegas, que se conmemora este sábado 17 de maio, e que este ano rende homenaxe ás cantareiras e á poesía popular oral. Unha das iniciativas destacadas é o desconto do 20% en libros en galego nas librarías Goyma, Mafranch e Follas Novas de Ribadavia. Esta rebaixa, activa desde o 12 ata o 17 de maio, será asumida polo propio Concello co obxectivo de incentivar tanto a lectura en galego como o comercio local.
A homenaxe ás cantareiras terá especial protagonismo o sábado 17 cun obradoiro intensivo de pandeireta, que se celebrará no antigo colexio da Alameda en horario de 10,00 a 14,00 horas, e de 16,00 a 20,00 horas. A actividade é gratuíta, aberta a todas as idades e niveis, e non require experiencia previa. As persoas interesadas deben inscribirse antes do 16 de maio a través do WhatsApp 649 74 85 09, xa que as prazas son limitadas.
A programación do Día das Letras Galegas coincide ademais coa celebración da cuarta edición da ‘Feira Revive do Ribeiro’, un evento de suprarreciclaxe e consumo consciente, que terá lugar os días 17 e 18 de maio na Igrexa da Madalena. Nesta cuarta edición, a feira incorpora tamén actividades vinculadas á conmemoración das Letras Galegas. Así, o sábado 17, ás 12,30 horas, terá lugar a actuación das Pandereteiras da Istoria; ás 17,00 horas, o obradoiro de construción dun pandeiro vegano impartido por Troula; e ás 19,30 horas, o DJ Chemigal ofrecerá unha sesión con música exclusivamente de artistas galegos.
A estas propostas súmase a exposición “Canta que cadramos ben”, que se pode visitar na Biblioteca Municipal de Ribadavia durante estes días. Trátase dunha mostra e unha unidade didáctica promovida pola Secretaría Xeral da Lingua da Xunta de Galicia, co fin de achegar á cidadanía o legado das cantareiras e da literatura popular oral. Esta exposición, elaborada polo IES Castelao, de Vigo; foi premiada no Concurso das Letras Galegas 2025 na categoría de secundaria, bacharelato, FP e ensinanzas de réxime especial. Un proxecto que pon en valor o patrimonio inmaterial que representa a tradición oral galega, conservada e transmitida por tantas mulleres desde o anonimato.
Con esta programación diversa e comprometida coa cultura galega, Ribadavia súmase un ano máis á celebración das Letras Galegas, promovendo a lingua, a música tradicional e o comercio local.
