O ‘Coro Gaos’ da Coruña ofrecerá o vindeiro sábado, 14 de xuño, ás 20,30 horas, un concerto no templo parroquial da Veracruz do Carballiño, con entrada totalmente libre. Esta agrupación polifónica coruñesa está formada por arredor de 50 voces, todas elas con ampla experiencia, e o seu repertorio divídese entre ‘a capela’ e a música sinfónico-coral, con especial énfase na ópera, participando anualmente nas producións da tempada da Coruña.
O ‘Coro Gaos’ posúe varios galardóns e premios de certames corais a nivel nacional e internacional. Ten actuado con orquestras coma a Sinfónica de Galicia ou a Orquestra Gaos, e colaborado con artistas como Ainhoa Arteta, Leo Nucci, Raphael ou Victor Manuel, entre outros. O seu repertorio é amplo e esixente con performances que van máis aló do son.
