A Denominación de Orixe Ribeiro recibiu un total de 26 galardóns nos premios ‘Decanter World Wine Awards’, un concurso internacional de viño que se celebrou en Londres (Reino Unido) durante o mes de maio. O concurso outorgou ao Ribeiro 11 medallas de prata e 15 de bronce. As 11 distincións de prata recaeron nas marcas Catro Parroquias Godello 2024, Catro Parroquias Treixadura 2024, Laudes 2023, Pazo Tizón 2023, Pingas de Mar Godello 2024, Pingas de Mar Fermentado en Barrica Godello 2023, Ou Outeiro 2023, Salvaxe 2023, Ramón do Casar Treixadura 2024, Ramón do Casar Nobre 2024 e Ramón do Casar Godello 2024.
Por outra banda, os viños Costeira Treixadura 2024, Tamborá Godello 2024, Colección 68 2024, Modus Vivendi 2024, Adega do Moucho 2021, A Imprenta Treixadura 2023, Maleiga Intre 2023, Maleiga Lapso 2023, Casar de Vide 2023, Gran Alanís 2024, Gran Alanís Castes Brancas 2024, Cunqueiro Terceiro Milenium 2023, Samiel 2024, Ramón do Casar Varietal 2024 e Ramón do Casar Lento 2021 foron premiados cun galardón de bronce.
“Queremos destacar a progresión con bos resultados que nosa Denominación de Orixe ten ano a ano neste concurso internacional de tanta relevancia, sempre hai variacións, pero mirando de forma global, séguense valorando moi positivamente os nosos viños elaborados con variedades preferentes” comenta a presidenta do Consello Regulador da D.O. Ribeiro, Concha Iglesias.
Os premios Decanter World Wine Awards (DWWA) celebraron este ano a súa 22ª edición. Desde a súa creación, os DWWA consolidaron a súa reputación como o maior e máis influente concurso de viños do mundo, aclamado polo seu rigoroso proceso de avaliación a cegas. Durante dúas semanas en maio, 248 xurados de 35 países distintos (entre eles 72 Masters of Wine e 22 Master Sommeliers) cataron, debateron e compararon os méritos relativos a miles de viños participantes.
