A vicepresidenta primeira, Marta Novoa, e o presidente de SEGITTUR, Enrique Martínez, analizaron hoxe no Pazo Provincial o liderado destes traballos, que potenciarán dous ámbitos singulares da provincia ourensá.
A encarga enmárcase no proxecto “Ourense, preto de ti”, que conta cunha subvención de máis de 1,3 millóns de euros, dentro do Plan de Recuperación, Transformación e Resiliencia financiado polos fondos Next Generation, sendo a Deputación ourensá a única administración provincial de Galicia en obter esta achega para fomentar o turismo intelixente
Ourense, 18 de xullo de 2025.
A Deputación de Ourense liderará a nivel nacional o desenvolvemento de modelos de Destino Turístico Intelixente nos ámbitos do termalismo e do enoturismo, como recoñecemento ao potencial termal da provincia e da forte pegada que a viticultura ten no territorio con catro denominacións de orixe.
Un traballo que se enmarca no proxecto “Ourense, preto de ti”, que conta cunha subvención de máis de 1,3 millóns de euros, dentro do Plan de Recuperación, Transformación e Resiliencia financiado polos fondos Next Generation, sendo a Deputación ourensá a única administración provincial de Galicia en obter esta achega para fomentar o turismo intelixente.
A encarga á institución provincial abordouse esta mañá na reunión que mantiveron no Pazo Provincial a vicepresidenta primeira, Marta Novoa, e o presidente da Sociedade Mercantil para a Xestión da Innovación e as Tecnoloxías Turísticas (SEGITTUR), Enrique Martínez, acompañados polo director da Área de Transparencia e Goberno Aberto, Marcos Valiño.
Marta Novoa expresou a vontade da Deputación por liderar estes dous ámbitos de traballo, destacando “o noso interese en desenvolver estes proxectos, en tanto supón aproveitar as novas comunicacións de altas prestacións, como o AVE, e as novas tecnoloxías de forma intelixente para potenciar a promoción dos nosos recursos”.
Pola súa banda, Enrique Martínez transmitiu a “positiva valoración” sobre o proxecto “Ourense, preto de ti”, así como o interese no papel que vai xogar Ourense no liderado dos casos de uso -termal e enoturismo- que se estenderán ao resto dos territorios de España onde se desenvolve o plan de Destino Turístico Intelixente.
Entre os obxectivo que se marca a Deputación de Ourense, ademais dos eidos xa citados, figura a integración da súa plataforma de turismo intelixente na Plataforma Intelixente de Destino de SEGITTUR, ademais dun servizo de asistencia dixital personalizada ao turista en múltiples idiomas e o incremento da accesibilidade dixital aos recursos turísticos, entre eles os museos.
Neste contexto potenciarase como outra ferramenta de apoio a Oficina Virtual de Atención ao Cidadán (OUVAC), que facilita o contacto cos cidadáns dende diferentes canles de comunicación, tendo en previsión a creación dun área técnica de xestión e mantemento destes novos servizos.
