Os cinco integrantes do grupo municipal do Partido Popular compareceu hoxe en rolda de prensa para realizar unha avaliación do primeiro ano de cogoberno tra-lo pacto co PSdeG-PSOE no Concello do Carballiño, que califican de “satisfactorio” aínda que, según o seu voceiro e tenente de alcalde, José Castro-Gil, “podiamos ter feito algunhas cousas máis”. Asemade, e pese “ás diferencias políticas”, subliñan que a cohabitación cos socialistas está a funcionar. Unhas diferencias que se puxeron en evidencia recentemente respecto da organización da Festa do Pulpo, xa que a popular Elvira Torres, concelleira de Medio Ambiente, amosou o seu disgusto polo mantemento no mesmo espazo da zona de pubs no Parque Municipal, autorizada polo edil de Turismo, o socialista Manuel Dacal.
O tamén alcalde en funcións do Carballiño, José Castro-Gil, salientou os grandes proxectos que o Concello ten postos en marcha, con investimentos de 2 millóns por parte da Xunta e 1 millón da Deputación Provincial. Asimesmo, manifestou a súa intención de “mellorar o contacto directo dos veciños” e de promover os cambios necesarios para a optimizar a xestión do organigrama da plantilla de traballladores municipais.
A concelleira de Educación, Lorena Castro, comentou aspectos vencellados ás obras de rehabilitación levadas a cabo nos centros de ensino e na gardería Galiña Azul, así como o importante proxecto de reposición das instalacions do Conservatorio de Música a fin de paliar os efectos das emisións de gas radon. Pola súa banda, Elvira Torres, lembrou os 60.000 euros na mellora das ribeiras do río Arenteiro, así como o acondicionamento da pasarela da Toscaña e a creación do xardín aromático, entre outras actuacións. Plantexou coma novos proxectos a mellora da lagoa da finca das Barcias e do sendeiro e contorna do Bañiño de Arcos.
Diana González, edil de Comercio e Emprego, fixo referencia ao proxecto de transformación da Praza de Abastos nun ‘mercado excelente’, para o que xa se recibiron achegas de máis de 74.000 euros; a posta en marcha dos obradoiros xuvenil e dual e a realización de cursos de formación. Finalmente, Miguel Fernández, responsable da área de Medio Rural, comentou os traballlos de limpeza das fontes e lavadoiros nos diferentes núcleos de poboación e a futura execución, dentro do Plan Agader, do acondicionamento da estrada entre O Carballiño, O Penedo e Mesego, e avanzou a reforma da pista entre A Piteira e Paciños e a construcción de beirarrúas en Partovia, na antiga estrada a Ribadavia, e entre o IES Chamoso Lamas e o Parque Etnográfico.
