O tradicional ‘Concurso de Camisetas’, convocado polo Concello do Carballiño conta coa participación de 97 peñas, case unha vintena máis co pasado 2024. As agrupacións inscritas aínda poden presentar o deseño da súa camiseta na Casa do Concello ata mañá antes das 13,30 horas. A temática das creacións debe estar relacionada coa Festa do Pulpo e co país convidado nesta 63ª edición, Italia.
Aínda que a maioría de peñas están formadas por veciños e veciñas do Carballiño (grupos de amigos, familiares, traballadores dunha mesma empresa e mesmo parroquias), tamén hai participación de agrupacións de Ourense, Ribadavia e Vigo. Cada formación ten que contar cun número mínimo de 10 persoas, pero pode chegar aos máis de 100 integrantes, como é o caso da peña da parroquia do Carballiño.
A iniciativa, que fomenta a creatividade e participación da veciñanza, ten moito éxito entre a xuventude, pero cada vez son máis os maiores que tamén queren participar no concurso. Cada peña presenta un deseño de camiseta (pode incluír debuxos, imaxes, palabras, frases, números ou calquera outro elemento gráfico) co que opta a un dos tres premios principais. Un primeiro premio de 300 euros, un segundo de 200 euros e un terceiro de 100 euros. Ademais, todos os deseños que cumpran os requisitos recollidos nas bases recibirán unha compensación de 60 euros ata esgotar o crédito dispoñible. No caso de superarse o orzamento, terase en conta a orde de inscrición.
O Concello do Carballiño amosa o seu agradecemento ás 97 peñas participantes, que este sábado amosarán a súa creatividade no tradicional Concurso de Camisetas na Praza Maior.
