O Estadio de Espiñedo acolleu este mércores a presentación oficial dos novos xogadores da primeira plantilla do CD Arenteiro. Gorka, Aguza, William De Camargo e Diego Moreno posaron cos seus novos cores, acompañados polo director deportivo da entidade, Joan Farías. O responsable deportivo quixo subliñar a importancia destas incorporacións para o proxecto verde: “Hoxe presentamos xogadores que nos darán un salto na categoría. Diego Moreno é un xogador de futuro, vén do Valladolid e Valencia con bo resultado. É veloz e aporta moito desborde. Aguza achegaranos a súa gran experiencia para dar equilibrio ao equipo e poso no xogo. Gorka é un xogador contrastado, que nos dará seguridade e forza na defensa. E William, un vello coñecido, do que agardamos moitas alegrías”, salientou Farías.
Cada un dos futbolistas tamén tomou a palabra para compartir as súas primeiras impresións como xogadores do Arenteiro. Así, Diego Moreno apuntou que “Esperamos gozar moito do equipo. Temos un bo grupo de xente que xa sabe o que é competir nesta categoría. Veño a traballar, a aportar todo o que poida e a ser un compañeiro máis para todo o que se precise de min”. Aguza indicou “Veño a aportar equilibrio e experiencia. A sumar no grupo e a axudar tamén aos máis novos a adaptarse. Puiden aprender en moitos equipos e creo que podo engadir cousas ao bloque. A idea é seguir traballando e medrando, igualando e mellorando os últimos anos do club na categoría”.
Pola súa banda, Gorka tamén desexa “aportar experiencia. Levo varias tempadas nesta categoría, vivín de todo e penso que podemos dar un paso adiante. Quero recuperar sensacións, mellorar respecto ao ano pasado e facer un bloque sólido canto antes. Será un ano moi igualado e o esforzo non vai faltar”. Finalmente, William De Camargo salientou que “é un grupo san, con xente de calidade, e penso que podemos acadar cousas importantes. As primeiras sensacións son moi boas e teño moitas ganas de axudar co meu xogo ao equipo”.
“Coa presentación destes catro reforzos, Club Deportivo Arenteiro segue a dar forma a un plantel que afronta con ilusión e ambición a nova tempada”, conclúen dende a directiva da entidade.
