A Área de Servizos Públicos e Benestar Comunitario do Concello do Carballiño vén de asinar un contrato cunha empresa especializada no control de plagas co obxectivo de facerlle fronte á problemática da proliferación de pombas no casco urbano da vila. Dende este departamento municipal que dirixe a concelleira Rosa Fuentes decidíuse tomar medidas de prevención ante a crecente poboación destas aves, que supoñen un problema sanitario tendo en conta as súas deposicións e a intromisión en espazos como tellados e balcóns e públicos como poden ser as terrazas dos establecementos de hostalería.
Concretamente, a empresa adxudicataria colocará unhas gaiolas con comida e auga para atraer as pombas naquelas áreas onde o Concello determine ou sexan obxecto de demanda por parte da veciñanza, recibindo para elo a asistencia técnica que sexa necesaria, de xeito que se levará a cabo unha recollida periódica das aves. O periodo de actuación extenderase a un prazo máximo de seis meses e suporá un investimento de 5.000 euros.
En calquera caso, dende o Concello lémbrase á cidadanía que está totalmente prohibido proporcionarlle alimento ás pombas, ao abeiro da ordenanza municipal reguladora de boas prácticas e limpeza actualmente en vigor.
