O Concello do Carballiño despídese esta semana das actividades deportivas dos meses de verán, que gozaron dunha moi boa resposta por parte da poboación. A proposta incluíu clases semanais de ioga, pilates e aquagym, ademais de intensivos de baloncesto, fútbol e balonmán para os máis cativos.
As citas semanais gozaron dunha media de 40 participantes por sesión, unha cifra que mellora a asistencia da edición de 2024. “A acollida foi incluso mellor que o ano pasado e estamos moi satisfeitos”, asegura José Castro, concelleiro de Deportes.
As competicións de balonmán, fútbol e baloncesto congregaron a centos de rapaces e rapazas na Pista Vermella da Praza do Emigrante, onde socializaron e desfrutaron do deporte. “Con estas actividades buscamos fomentar hábitos de vida saudables e outras actividades de ocio, e o certo é que funcionan moi ben, había moita animación e moitísima xente”, resalta Castro.
Aínda que a programación estival termina esta semana, en setembro comezarán de novo as actividades deportivas municipais habituais durante o período lectivo.
