Ribadavia xa latexa ao ritmo da Istoria. Veciñas, veciños e milleiros de visitantes volverán atoparse esta fin de semana nas nosas rúas para celebrar xuntos unha festa que é moito máis ca un evento: é unha tradición compartida, unha lembranza do noso pasado e un orgullo colectivo.
A programación da XXXVI Festa da Istoria, elaborada pola Asociación Coordinadora Festa da Istoria co apoio imprescindible máis de 500 voluntarias e voluntarios, inclúe máis de 30 actividades que encherán de música, teatro, xogos, gastronomía e recreacións históricas os recunchos máis senlleiros da vila.
Hoxe, venres 29, a antesala do gran día, arrancará co X Concurso de Pintura Rápida e coa apertura do Campamento Medieval no Castelo dos Sarmiento, onde pequenos e maiores poderán mergullarse nos oficios e saberes doutros tempos. Pola tarde, as obras do concurso exporanse no club artístico, e ás 21,00 horas terá lugar un dos momentos máis simbólicos: a lectura do Bando da Istoria, acompañada polos Tabaleiros, e que contará coa presenza do conselleiro de Educación, Román Rodríguez. A música e o teatro darán vida á noite con actuacións do Coro da Istoria, Ensemble La Lira, Kantantibus, Pandereteiras, O Malsín e o Grupo Coanhadeira.
E mañá, sábado 30, no día grande da celebración, voltarán as citas máis agardadas: o Gran Desfile da Istoria (dende ás 11,00 horas e co pregón a cargo de Pedro Valderey e o nomeamento de Notables), o Mercado Medieval, o Baile Medieval, a Voda Xudía, o Xadrez Vivente, os duelos de cabaleiros, a cetrería ou o Gran Torneo Medieval na Veronza.
Ata as 19,00 horas será preciso vestir traxe medieval para entrar no Castelo, onde se poderá asistir a recreacións como a vestimenta dun mercenario do século XV. De 19,00 a 22,00, a entrada será libre.
Como cada ano, o Banco da Alhóndiga permitirá cambiar euros por marabedís ata as 22,00 horas, un xesto sinxelo pero fundamental que axuda a soster e mellorar a nosa festa.
A xornada pecharase coa música tradicional de Tanto Nos Ten, que porán a bailar a Praza de San Martiño dende as 23:00 horas.
O domingo 31, o Mercado Medieval seguirá aberto de 12:00 a 22:00 horas, acompañado de música e animación polas rúas, para despedir con alegría e agradecemento a XXXVI Festa da Istoria.
Un ano máis, grazas á ilusión de todo un pobo, ao traballo da Asociación Coordinadora Festa da Istoria e á dedicación incansable de centos de voluntarios e voluntarias, Ribadavia convértese en escenario vivo da súa propiá historia.
Aparcadoiros para vehículos
Co obxectivo de darlle vistosidade ao festexo, o Concello de Ribadavia reorganiza o tráfico esta fin de semana no casco histórico da vila para asegurar o correcto desenvolvemento da Festa da Istoria. A montaxe e desmontaxe dos diferentes postos do mercado medieval e das áreas de xantar fan necesario restrinxir o estacionamento e o tráfico nas rúas Salgado Moscoso, Banda La Lira, Yáñez e Praza de San Xoan ata o domingo 31, ás 22,00 horas. O resto de rúas e prazas do casco histórico terán o tráfico e estacionamento limitado desde as 18,00 horas de hoxe, venres, ata as 22,00 horas do domingo 31.
O Concello tmaén habilitará aparcadoiros disuasorios no patio do IES O Ribeiro e no Polígono Industrial de San Cristovo, para que os visitantes poidan estacionar os seus vehículos nas aforas da vila. Ademais, o Concello fleta autobuses rotatorios de 10,00 a 22,00 horas o sábado, día grande da Istoria, desde Francelos, San Cristovo e Sampaio, para facilitar o transporte desde os núcleos próximos a Ribadavia.
