Trátase dunha adaptación da novela máis célebre de Frank Kafka, está dirixida por Carlos Álvarez Ossorio e conta co patrocinio da Axencia Galega de Industrias Culturais (Agadic)
Ourense, 29 de agosto de 2025.
O vindeiro 4 de setembro será a estrea nacional da obra “A Metamorfose”, que Sarabela pon en escea no Teatro Principal e representarase durante os días 4, 5 e 6 de setembro a partires das 21.00 horas.
Esta adaptación da novela máis célebre de Frank Kafka está dirixida por Carlos Álvarez Ossorio e conta co patrocinio da Xunta de Galicia a través da Axencia Galega de Industrias Culturais. Na presentación do espectáculo participaron o vicepresidente segundo e deputado de Cultura, César Fernández; o director da Agadic, Jacobo Sutil; o director da peza, Carlos Álvarez Ossorio; o elenco de Sarabela: Elena Seijo, Fernando Dacosta, Fernando González, Sabela Gago, Fina Calleja; e a directora do Teatro Principal, Olga Mojón.
César Fernández destacou a Sarabela Teatro como “símbolo de identidade da cultura na provincia” e puxo en valor a aposta da Deputación pola cultura, “non só en propostas coma esta, senón polo investimento en infraestruturas culturais de referencia como o Teatro Principal”, que está renovándose en aspectos como a iluminación e o escenario.
Pola súa banda, Jacobo Sutil fixo referencia á Deputación como “socio comprometido” nas iniciativas culturais coa Xunta de Galicia e Agadic e tildou a Sarabela Teatro como “unha das compañías máis senlleiras e creativas de Galicia”.
No que atinxe ao director da obra, Carlos Álvarez Ossorio definiu o texto como “fascinante e con gran esixencia de investigación”, amosando o seu aradecemento coa montaxe e coa compañía.
Fernando Dacosta, de Sarabela Teatro, amosou a “ilusión” do equipo pola obra e comentou que “o gran reto por diante é representar un clásico universal”.
Por último, Olga Mojón lembrou o funcionamento das entradas, xa a venda e dispoñibles na billeteira ata dúas horas antes da función.
Argumento
Sen a menor cerimonia, o texto coloca ao lector diante do famoso Gregor Samsa, transformado en insecto monstruoso. A partir de aí, a historia é narrada cun realismo inesperado que asocia o inverosímil e o sentido do humor o que é tráxico, grotesco e cruel na condición humana – todo no estilo transparente e perfecto dese mestre inconfundible da ficción universal. Rescataremos na versión escénica de Carlos Álvarez Ossorio a dimensión cómica, grotesca do texto, que ocasionalmente desemboca no hilarante “slapstick”.
A obra trasládalle cuestións ao espectador como: Que pasa cando lle quitamos a categoría de humano a un ser humano? Se non son seres humanos, entón, que son? bichos? insectos?
“A Metamorfose” mostra a necesidade do ser humano de ser recoñecido, valorado e amado polo que é, non polo que produce ou achega.
