Tra-la aceptable resposta da veciñanza ás actividades do ‘Carballiño Deportivo’ que se desenvolveron entre os meses de setembro do pasado ano e maio do actual, a Área de Deportes do Concello vén de anunciar a súa continuidade para o vindeiro outono. Estas actividades serán totalmente gratuítas e abertas a toda a poboación.
A única novidade é o traslado do programa de ioga e pilates dende o pavillón polideportivo Paco Chao ata o recinto existente no colexio público Calvo Sotelo, moito máis céntrico, segun apuntou o concelleiro de Deportes, José Castro, de xeito que as clases darán comezo unha vez rematadas as festas patronais do San Cibrao, dende o 19 de setembro, tal e como comentou Rebeca Amil, xerente do ximnasio Kórpore, a entidade colaboradora. Os venres, ás 18,00 horas, será a quenda de pilates, con Santi Domínguez de monitor, mentres á de ioga terá lugar os sábados ás 12,00 horas, con Angélica Molina á fronte.
Tamén se lle dá continuidade a “Carballiño na auga”, de pilates e ioga na auga, que se celebrará no balneario de As Caldas de Partovia os luns, dende ás 16,00 horas, e os mércores, ás 20,00 horas. As persoas interesadas deberán inscribirse coa antelación suficiente na app do Concello do Carballiño, de xeito que terán dereito a asistir un máximo de dous días ao mes.
Asemade, manterase a saída das andainas matinais dos domingos, “con percorridos aproximados de 10 quilómetros para facer nunha media de dúas horas, asumibles para calquera tipo de idade”, subliñou o concelleiro.
A intención da Concellería de Deportes é “ampliar estas actividades ás parroquias do rural do municipio a partir de outubro ou novembro, para que a xente maior poida ter acceso á práctica deportiva”, adiantou o propio José Castro.