A Concellería de Benestar Comunitario e Servizos Públicos do Carballiño vén de mellorar a mobilidade peonil da rúa San Cibrán, que comunica o casco urbano coa localidade de Señorín. A intervención, realizada polo persoal municipal, incluíu o acondicionamento das beirarrúas, a colocación de varios bancos e a limpeza dos taludes dos solares anexos, que ocupaban parte da verea e dificultaban o paso de viandantes.
A concelleira de Benestar Comunitario, Rosa Fuentes, pon en valor a actuación, que dá resposta ás demandas da poboación e favorece a mobilidade dos veciños e veciñas entre o centro do Carballiño e a parroquia de Señorín.
Esta intervención súmase ás que a Concellería de Seguridade vén realizando nas últimas semanas para mellorar a seguridade vial do Carballiño, entre as que destaca o pintado de 84 pasos de peóns da vila.
