‘Xantar’ cumpre 26 anos de traxectoria promocionando a calidade dos produtos do agro e do mar galegos, a profesionalidade dos hostaleiros e o papel que xoga a enogastronomía á hora de elixir Galicia como lugar de visita. O Salón Internacional de Turismo Gastronómico, a única feira internacional de turismo gastronómico de España presentou esta mañá os datos da súa 26ª edición que se celebrará en Expourense entre o 20 e o 23 de novembro.
OS MELLORES ESTABLECEMENTOS
Expourense converterase a partir do próximo xoves no epicentro do turismo enogastronómico peninsular a reunindo a 70 expositores e con 4 países representados (España, Perú, Portugal e Venezuela). A recreación dun gran Mercado Enogastronómico con pratos galegos e internacionais é a principal novidade deste ano. Esta área compleméntase con 3 restaurantes do estilo habitual de Xantar que ofrecen menú pechado composto por produtos autóctonos de calidade, 2 aulas gastronómicas, 1 aula de catas comentadas, 1 aula reservada en exclusiva para catas os produtos de Hijos de Rivera – Estrela Galicia e 1 espazo de degustación das festas gastronómicas de Galicia. Tamén será nova a creación dunha Zona Infantil con inchables, xogos e monitores para que as familias #gozar da súa visita a Xantar.
A 26ª edición de Xantar foi presentada esta mañá nun acto celebrado na Praza de Abastos de Ourense que contou coa participación do director xeral de Comercio da Xunta de Galicia, Gabriel Alén; do delegado territorial da Xunta de Galicia en Ourense, Manuel Pardo; do deputado de Turismo e de Representación Institucional da Deputación de Ourense e presidente do INORDE, Rosendo Fernández; do presidente da Unión de Hostaleiros de Ourense, Javier Outomuro; do xefe da área Provincial de Turismo da Xunta en Ourense, Cecilio Santalices, do presidente da Praza de Abastos, Emilio González; e do director de Xantar e director xerente de Expourense, Rogelio Martínez. Esta presentación incluíu unha degustación ofrecida por empresarios asociados á UHO que terán unha participación activa en Xantar poñéndose á fronte de varios postos do Mercado Enogastronómico. Doutra banda, esta presentación realizouse na Praza de Abastos que este ano colabora tamén co salón organizando un showcooking co Chef Miguel González con produtos de mercado e coa colaboración da Xunta de Galicia (previsto para o venres 21 de novembro e as 18.30 h.).
Na liña de anos anteriores, Xantar volverá poñer en marcha as distintas accións para atraer maior número de visitas e para animar ao público de proximidade a participar na feira. A entrada ao salón seguirá sendo gratuíta. Tamén será gratuíta, ata completar aforo, a participación en calquera das 100 actividades que ofrece o programa desta edición e que inclúen talleres de cociña en directo, catas comentadas de produtos como veu, queixo, mel ou conservas, ou as distintas degustacións de festas gastronómicas de Galicia.
TURISMO DE PROXIMIDADE
Xantar 2025 conta coa participación de tres deputacións provinciais de Galicia, de varios xeodestinos e GDR (Ribeiro-Carballiño, Trevinca -Valdeorras, Terra de Celanova – Serra do Xurés) e de concellos galegos das 4 provincias que participan de forma independente para promocionar o seu turismo gastronómico. Na presenza internacional destaca un ano máis a presenza de Portugal que estivo presente en Xantar desde a súa primeira edición. A Entidade de Turismo Porto e Norte é o principal socio estratéxico deste salón no país veciño e facilita cada ano a participación de numerosas cámaras municipais lusas que acoden ao salón con caseta e organizan varias showcookings, catas comentadas e degustacións para promocionar o turismo de proximidade. Hai que destacar un ano máis a gran presenza de expositores procedentes do Norte. En total, participan de forma directa e independente no salón unha decena de cámaras municipais portuguesas que se suman ás que participan baixo o paraugas de Turismo Porto e Norte. Deste país participa tamén, por primeira vez ademais, a Cámara de Comercio de Angra do Heroísmo, nas Illas Azores. Ademais de contar cunha caseta promocional do destino mostrarán a súa gastronomía a través de talleres de cociña e degustacións. Trátase dunha participación que ten un compoñente emocional pola unión que sempre existiu entre Galicia e Portugal, pero tamén estratéxica, xa que é o principal mercado emisor de turistas estranxeiros a Galicia. E ao mesmo tempo a Eurorrexión Galicia – Norte de Portugal conforman un destino único cunha oferta enogastronómica de calidade para posicionarse internacionalmente. Tamén participarán profesionais de países como Perú. Para facilitar a visita a Xantar, Expourense conta coa colaboración de Renfe, Transporte Oficial, que ofrece un 10% de desconto nos billetes de Longa Distancia e AVE.
RESTAURACIÓN
O Mercado Enogastronómico é a novidade en restauración desta edición. Neste espazo poderán atoparse unha ducia de postos cun comedor central no que o visitante pode elixir entre comida venezolana, mexicana, peruana, portuguesa e, por suposto, galega. Dentro da gastronomía galega, este mercado ofrece opcións como polbo á galega, mariscos, callos, empanada, queixos, embutidos, xeados e sobremesas… e para beber o espazo contará cunha barra de Estrela Galicia e un espazo con viños das cinco D.Ou. de Galicia. Este Mercado conta coa colaboración dos hostaleiros asociados á UHO e é unha excelente oportunidade para promocionar a oferta hostaleira da cidade.
Xantar 2025 pretende converterse ademais no punto de encontro ou “quedada” para despois da xornada laboral coa organización de concertos de bandas galegas que animen a achegarse ao salón para gozar da música e tomar algo ou cear alí despois. O Mercado Enogastronómico acollerá concertos todos os días de celebración do evento. Os grupos “7 Rojo”, “GinToni’s”, “Teño sede” e “Movilla e os Irrepetibles” ofrecerán actuacións de xoves a domingo, nesta orde. Estes concertos complementaranse con actuacións de baile tradicional portugués, venezolano e a actuación do grupo “arroba de viño” do Grove. Dentro da restauración tradicional de Xantar, esta edición contará con 3 restaurantes. O INORDE non faltará tampouco este ano co seu restaurante desde o que promocionará Un “Menú de Outono” que recolle a riqueza enogastronómica da provincia de Ourense e que conta coa participación de empresas da provincia como Coren e Grupo Cuevas. Carlos Parra será de novo o chef á fronte deste restaurante. A comarca de Valdeorras estará representada a través de dous restaurantes. O primeiro promocionará as festas gastronómicas de Valdeorras e onde non faltará o tradicional cocido, o botelo do Barco ou o codillo da Rúa acompañado dunha degustación das sobremesas típicas da comarca e regado con viños da D.Ou. Valdeorras. O outro restaurante de Valdeorras estará centrado na promoción da gastronomía tradicional que desde hai décadas ofrece o restaurante rués Mantesil con opcións como a empanada de maravallas ou o arroz con androlla.
PROGRAMA DE ACTIVIDADES
Como é habitual, o programa de accións que ofrecerá o salón estará orientado a proxectar internacionalmente, desde a perspectiva da calidade e da sustentabilidade, o turismo enogastronómico de Galicia, do resto da Península Ibérica e de Iberoamérica. No que respecta a as actividades, Xantar reunirá a recoñecidos chefs que impartirán talleres de cociña en directo enmarcados no XX Encontro Internacional de Gastronomía Saudable e Sostible que ofrecerá ao público máis de 100 experiencias entre showcookings, catas comentadas, presentacións e degustacións. Esta edición contará con dúas aulas gastronómicas (a de Grupo Cuevas e a Bricocentro) na que se impartirán máis de 50 talleres de cociña en directo (tamén haberá demostracións de cociña en varias casetas expositoras).
Haberá ademais unha aula no que se impartirán unha trintena de catas comentadas de produtos como viños, meles, conservas de peixe e marisco, queixos, augardentes e licores. A novidade en formación é que este ano Estrela Galicia terá unha aula reservada para a cata comentada de distintos produtos de Hijos de Rivera, acollendo ademais a presentación dalgunha novidade da marca. Tamén se celebrará unha nova edición, a décimo terceira xa, do Concurso de Cociña Gourmet organizado polo Grupo Cuevas.
E relacionado tamén cos Concursos, este ano Xantar acollerá por primeira vez o Concurso “DevoraJalys” promovido por esta marca de patacas fritas da comarca da Limia no que os participantes terán que demostrar cantas patacas fritas son capaces para comer nun minuto. Celebrarase en venres 21 de novembro a partir das 20.00 h. Este programa completa con actividades paralelas como o XXI Encontro Internacional de Confrarías que reunirá a 30 entidades e que se celebrará o sábado 22 de novembro.
GALA DE PREMIOS DE RADIO TURISMO
Como é habitual, Xantar é o escenario elixido por Radio Turismo para organizar a Gala de entrega dos Pratos de Ouro aos restaurantes destacados da provincia de Ourense e os Gorros Brancos a recoñecidos chefs ourensáns. A esta entrega, Expourense sumou as Medallas de Ouro de Xantar que cada ano son entregadas a entidades ou persoas que colaboraron estreitamente con esta cita. Esta gala celebrarase o venres 21 de novembro ás 18.30 h. e os recoñecidos son os seguintes:
Pratos de Ouro:
-Restaurante A Feira no Market do Estadio Santiago Bernabeu (Madrid).
– Dous Puertas (Ourense).
– O Campanario (Nogueira de Ramuín).
Gorros Brancos:
Javier Silva Díaz e Francisco Silva González. Pai e Fillo. Restaurante Lusitano de Lobios.
Medallas de Ouro de Xantar:
UHO – Unión de Hosteleros de Ourense.
María Doallo Freire. Periodista de La Voz de Galicia (In memoriam).
COOPERACIÓN PÚBLICO-PRIVADA
Xantar convértese un ano máis nun exemplo de cooperación público-privada. Entre os seus principais apoios conta coa administración autonómica (a través do apoio da Axencia de Turismo de Galicia e das Consellerías de Mar e do Medio Rural), entre outras colaboracións como a de Promoción do Emprego, a través da participación de Economía Social de Galicia ou da de Educación que facilita a participación de varios centros de Formación Profesional. Tamén conta co apoio da administración provincial a través da colaboración da Deputación Provincial de Ourense.
Xantar volve contar co respaldo de grandes empresas do sector alimentario e servizos como o caso de Gadis, Coren, Estrela Galicia, Cabreiroá, Grupo Cuevas e Bricocentro. Tamén hai que sumar o apoio da Deputación de Lugo e de Renfe como tren oficial. Como entidades colaboradoras conta con ANFACO, Green Ambiental e a Praza de Abastos de Ourense.
As novidades do salón poden seguirse a través da súa web www.xantar.org ou das súas redes sociais www.facebook.com/xantar ou de Instagram a través de @xantaroficial.
O horario de feira será de 11,00 da mañá ata a 1,00 h. da madrugada, excepto o domingo 23 de novembro, que a feira pecha ás 18,00 h.
