As propostas recibidas distribúense en particulares (19); asociacións e colectivos veciñais ou ambientais (6); mancomunidades e comunidades de montes (4); profesionais do sector -bombeiros, protección civil, técnicos- (7); alcaldes e concellos (3); sector empresarial (2); sindicatos agrarios (1); propostas internacionais -Portugal- (1); partidos políticos (2)
Unha vez analizadas estas iniciativas, convocaranse as 3 mesas sectoriais contempladas para a súa adecuada canalización: a de prevención, infraestruturas e novo modelo forestal; a que aglutina aos dispositivos de extinción; e a de participación cidadá, coa participación daquelas entidades e persoas que trasladaron as súas propostas
Ourense, 29 de novembro de 2025
A Deputación de Ourense pechou o prazo de recepción de achegas para a Mesa Provincial de Incendios, un órgano creado pola institución provincial para impulsar un novo enfoque fronte aos incendios forestais tras a vaga do pasado verán.
En total, recibíronse 44 propostas, procedentes de ámbitos moi diversos: particulares, colectivos veciñais, comunidades de montes, expertos en emerxencias, técnicos forestais, profesionais do sector, asociacións ecoloxistas, sindicatos agrarios, alcaldes e representantes do tecido empresarial. Esta pluralidade garante unha visión ampla e realista da problemática, así como unha base sólida para avanzar en medidas transformadoras.
OS MELLORES ESTABLECEMENTOS
As propostas recibidas distribúense do seguinte xeito: particulares (19); asociacións e colectivos veciñais ou ambientais (6); mancomunidades e comunidades de montes (4); profesionais do sector -bombeiros, protección civil, técnicos- (7); alcaldes e concellos (3); sector empresarial (2); sindicatos agrarios (1); propostas internacionais -Portugal- (1); partidos políticos (2).
Unha vez analizadas estas iniciativas, convocaranse as 3 mesas sectoriais contempladas para a súa adecuada canalización: a de prevención, infraestruturas e novo modelo forestal; a que aglutina aos dispositivos de extinción; e a de participación cidadá, coa participación tamén daquelas entidades e persoas que trasladaron as súas propostas. Esta participación evidencia unha forte implicación social e institucional para afrontar de maneira conxunta un dos maiores desafíos da provincia.
Principais liñas de traballo que emerxen das propostas
A análise preliminar das achegas permite identificar sete eixos estratéxicos, que a Mesa Provincial de Incendios comezará a desenvolver na súa vindeira reunión:
No que atinxe á prevención estrutural e ordenación do territorio, prantéxanse propostas sobre a recuperación do mosaico agroforestal; así como o impulso do pastoreo extensivo e de proxectos gandeiros en zonas estratéxicas. En materia de redución de especies pirófitas e fomento das frondosas autóctonas, prantéxase o reforzo das concentracións parcelarias e bancos de terras.
No ámbito da limpeza, cortalumes e franxas de protección, as propostas achegadas abordan a limpeza efectiva e anual de pistas, faixas secundarias e cortalumes; o reforzo das obrigas de limpeza próximas ás aldeas e vivendas; así como a actuación subsidiaria das administracións nos casos de incumprimento.
En materia de brigadas e dispositivo operativo, as propostas recibidas prantexan a creación ou reforzo de brigadas municipais con actividade permanente; a integración e coordinación real entre GES, Consorcio Provincial e operativos forestais; a mellora de medios materiais, comunicacións e equipos TETRA: e as propostas para unha brigada provincial de intervención rápida.
No que respecta a infraestruturas: puntos de auga, accesos e pistas forestais, as suxerencias presentadas contemplan a ampliación e mantemento de hidrantes, depósitos e puntos de carga; a recuperación de camiños forestais estratéxicos; así como zonas de amortiguamento entre masas forestais e vivendas.
Tecnoloxía e detección temperá é outros dos bloques temáticos das propostas recibidas, contemplando drones de vixilancia con sensores térmicos; sistemas intelixentes de aviso e app cidadá; e colaboración con iniciativas europeas e portugueses.
No que atinxe á educación, participación social e voluntariado, as propostas contemplan medidas como programas educativos; formación en autoprotección nas aldeas; e bolsas de voluntariado rexistrado e coordinado.
O último bloque temático céntrase na mellora de protocolos, coordinación e planificación. Así, propóñense temas como a revisión dos plans municipais de emerxencia (PAM); o preposicionamento de medios ante xanelas críticas de risco extremo; e a cooperación interprovincial e internacional na loita contra grandes incendios.
Unha participación sen precedentes
A Mesa Provincial de Incendios, integrada por todos os partidos políticos con representación na Deputación, destaca que “a resposta cidadá superou todas as expectativas e confirma que Ourense quere avanzar cara a un novo modelo de prevención e xestión dos incendios baseado no coñecemento, na corresponsabilidade e na cooperación institucional”.
Engadindo que a Mesa Provincial de Incendios “non nace para producir documentos, senón para impulsar cambios reais, medibles e coordinados. Esta é a prioridade que asumimos como Deputación”.
Próximos pasos
A partir de agora, un equipo técnico da Deputación clasificará e sistematizará todas as propostas a través das 3 mesas sectoriais. Acto seguido, a Mesa Provincial de Incendios celebrará unha sesión monográfica para debatelas e proceder a Elaborar un Informe Provincial de Medidas Prioritarias, que será elevado á Xunta de Galicia e á Federación Galega de Municipios e Provincias.
