I Esta exposición enmárcase no proxecto «Corrente cultural», un programa que percorre Galicia da man da colaboración entre ABANCA, Afundación e diferentes concellos galegos
10.12.2025. O Concello de Xinzo de Limia, ABANCA e Afundación, a Obra Social de ABANCA, veñen de asinar un convenio para realizar conxuntamente a exposición «Destino. Unha peregrinación de Manuel Valcárcel». No acto de rúbrica estiveron Amador Díaz Penín, alcalde do Concello de Xinzo de Limia; Mateo Alonso San Román, coordinador institucional de ABANCA en Ourense; e Beatriz Fernández-Anguiano, coordinadora institucional de Afundación en Ourense e Lugo. A mostra poderase visitar desde o 18 de decembro ata o 16 de xaneiro na Casa da Cultura de Xinzo de Limia.
«Destino. Unha peregrinación de Manuel Valcárcel» inclúe imaxes de catro peregrinacións en catro países de catro continentes ―O Tíbet, Senegal, México e Galicia―, alicerzándose na fotografía documental como ferramenta narrativa e contando distintas historias unidas por un mesmo sino. Concíbese esta expedición como unha viaxe en espiral de seres humanos unidos e guiados polo destino, na busca de respostas a preguntas universais que nos atinxen a todas as persoas do mundo.
OS MELLORES ESTABLECEMENTOS
Á súa vez, esta exposición realiza a súa particular viaxe polas diferentes localidades de Galicia nas que se mostra dentro do programa «Corrente cultural», que permite a Afundación programar actividades culturais, grazas á colaboración cos concellos e con ABANCA.
Nesta terra de emigrantes e peregrinos sabemos mellor ca ninguén da importancia vital da viaxe, un percorrido físico que implica, en paralelo, unha reflexión interior sobre os nosos valores, a nosa identidade e as nosas necesidades. Nas catro peregrinacións do fotógrafo galego Manuel Valcárcel fálasenos de familia, de emigración, de envellecemento, de sostibilidade e de fogar, grandes temas da humanidade que teñen a súa correspondencia no labor social de Afundación, a Obra Social de ABANCA, e que nesta exposición afloran a través da viaxe interior e física de Valcárcel e das súas potentes imaxes cargadas de emoción, vida e cor.
