A xornada terá lugar o 18 de abril na Cidade da Cultura e será inaugurada polo conselleiro de Sanidade
· A intelixencia artificial, a saúde mental infantil, a detección precoz e práctica clínica centran o programa da reunión pediátrica
Santiago, 13 de abril de 2026. A Asociación Galega de Pediatría de Atención Primaria (AGAPap), celebrará o vindeiro sábado, 18 de abril, na Cidade da Cultura, unha nova edición da súa Reunión Anual, que en 2026 alcanza xa a súa décimo novena convocatoria. O encontro, consolidado como unha cita de referencia para os profesionais do ámbito pediátrico, incluirá unha completa xornada científica na que participarán especialistas de recoñecido prestixio para abordar distintos temas de actualidade médica.
Será unha xornada de convivencia e formación, eminentemente práctica, dirixida a pediatras de atención primaria en Galicia, pediatras hospitalarios ou pediatras residentes, que poderán “actualizar e mellorar os seus coñecementos a través dos relatorios e talleres”, tal e como sinala a presidenta da asociación, Amparo Rodríguez.
O programa arrincará ás 09.00 horas no Auditorio do Edificio CINC, cun seminario titulado Cando nada é o que parece: a historia do neno con urina negra, que será impartido pola doutora Alicia Mirás Veiga, do Hospital Universitario de Burgos. Nela, a especialista presentará tres casos clínicos de patoloxía de urxencias pediátricas cun enfoque interactivo, antes do acto de inauguración oficial, previsto para as 10.30 horas, e que contará coa participación do conselleiro de Sanidade, Antonio Gómez Caamaño.
Ao longo da mañá desenvolverase unha mesa de expertos na que se tratarán diferentes cuestións clínicas de interese e que poñen de relevo a importancia de abordar de forma integral algúns dos principais retos da pediatría actual.
Así, a doutora Ana Prado Carro, da Unidade de Endocrinoloxía Pediátrica do Hospital Materno Infantil Teresa Herrera, falará da diabetes mellitus tipo 1 desde as súas fases presintomáticas, explicando como a detección precoz resulta clave para anticiparse á enfermidade e mellorar o prognóstico dos pacientes desde idades temperás. Do mesmo xeito, o relatorio da neuropediatra Carmen Gómez Lado, do Hospital Clínico de Santiago, sobre a abordaxe terapéutica do TDAH e os seus comorbilidades, poñerá de manifesto como a saúde mental infantil adquire un papel cada vez máis relevante, especialmente en trastornos como o TDAH e os seus comorbilidades, e que requiren un enfoque terapéutico rigoroso e baseado na evidencia.
OS MELLORES ESTABLECEMENTOS
Finalmente, a doutora Raquel López Rodríguez, do Hospital Universitario Lucus Augusti de Lugo, ensinará a interpretación da espirometría na práctica clínica a fin de que os asistentes coñezan máis esta ferramenta diagnóstica que permite unha adecuada avaliación da función respiratoria, facilitando decisións médicas máis precisas.
Xa en horario de tarde, a partir das 16.00 horas, o encontro continuará con varios talleres prácticos orientados á formación aplicada. Entre eles inclúense unha sesión sobre dermatoscopia en pediatría, impartida por Ana Batalla Cebey e Noelia Moreiras Arias, e outra dedicada a habilidades cirúrxicas e cirurxía menor en Atención Primaria, que dirixirán Roberto Méndez Gallart e María García Palacios, todos eles facultativos do Clínico compostelán.
A xornada concluirá coa conferencia do cardiólogo Carlos Peña Gil, investigador e promotor de proxectos de innovación sanitaria e mellora continua da calidade asistencial, que analizará as necesidades dos profesionais sanitarios no contexto actual marcado polo avance da intelixencia artificial, prevista para as 18.45 horas, e que poñerá o broche de ouro á xornada.
