O “Pulpo Fest”, a coñecida como Festa da Xuventude, unha das citas máis esperadas da ‘LXIV Festa do Pulpo do Carballiño’ por parte dos máis novos, celebrarase durante a tarde do domingo na finca As Barcias, situada entre o Parque Municipal e a avenida do Arenteiro.
Nesta ocasión, preséntase un cartel de luxo con 14 artistas de música urbana. A rapazada poderá desfrutar dunha programación de gran calidade, encabezada polo afamado DJ Ballesteros, referente en España e Europa na escena musical, e pola recoñecida discomóbil galega A Gramola.
O madrileño, que colabora con artistas internacionais como Chimbala, Lírico en la casa o Kiko el Crazy, fíxose un oco nos principais festivais e discotecas grazas ao seu estilo único e ao seu micro arrollador. Con 12 anos de traxectoria, Ballesteros será un dos pratos fortes da Festa da Xuventude, xunto coa discomóbil galega A Gramola.
Na cita musical tamén actúan Codeso, Saúl Gallego, Nico Batea, Diego Valeiras, Rivero, Aitor Alfonsín, Javii, Ivi Bralo, Dúo y Medio, Dris, Sergito, De Melo y Mencler. O evento, de acceso completamente gratuíto, contará cunha zona de food trucks.
