Ernesta Seoane reclama máis prevención e información aos condutores no semáforo da estrada de Ourense e pide coñecer o contrato e as condicións técnicas do sistema de videovixilancia
Celanova, 1 de outubro de 2026. O Grupo Municipal do BNG de Celanova vén de presentar unha moción para reclamar ao Concello unha revisión do funcionamento e da sinalización do sistema de control fotográfico “foto-vermello” instalado no semáforo situado na intersección da estrada de Ourense coa rúa da Coutada.
A formación nacionalista deixa claro que comparte a necesidade de adoptar medidas que melloren a seguridade viaria e protexan tanto os peóns como os vehículos, pero considera que este tipo de dispositivos deben ter unha finalidade fundamentalmente preventiva e ir acompañados dunha información suficientemente clara para que os condutores poidan adaptar a súa condución con antelación.
Segundo explica a portavoz municipal, Ernesta Seoane, nas últimas semanas o BNG recibiu queixas de veciños e usuarios da vía pola sinalización existente. O grupo considera que a advertencia da presenza do sistema resulta pouco visible e está situada demasiado próxima ao punto de control, circunstancia que, ao seu xuízo, reduce a capacidade preventiva do dispositivo e pode provocar reaccións bruscas dos condutores.
“Non cuestionamos que se controle o cumprimento dos semáforos. O que reclamamos é que o obxectivo principal sexa conseguir unha circulación máis segura, non acumular sancións. Se queremos que os vehículos reduzan a velocidade e respecten o semáforo, o primeiro é advertir con claridade e con suficiente antelación”, sinala Seoane.
Suspensión temporal das sancións mentres se revisa o sistema
A moción propón que se suspenda temporalmente a emisión de novas multas e a tramitación dos expedientes sancionadores vinculados ao dispositivo mentres non se leven a cabo as melloras de sinalización reclamadas polo BNG.
O grupo municipal pide ademais que se revise tecnicamente o funcionamento do semáforo, incluídos os tempos de transición entre as fases, e que se comprobe que o dispositivo foto-vermello cumpre todos os requisitos técnicos aplicables.
Para o BNG, esa revisión permitiría disipar dúbidas entre a veciñanza e garantir que todas as sancións se producen cun sistema correctamente configurado e cunhas condicións coñecidas e transparentes.
Máis medidas preventivas na estrada de Ourense
A proposta do BNG non se limita ao sistema sancionador. A moción reclama instalar máis elementos de advertencia e estudar a implantación de pasos de peóns elevados e outras medidas de calmado de tráfico que permitan reducir a velocidade dos vehículos antes de chegar á zona máis urbana.
“O foto-vermello debería ser a última ferramenta, para comportamentos puntuais que realmente poñen en perigo a seguridade. Antes temos que conseguir que a propia configuración da vía favoreza velocidades máis baixas e unha convivencia segura entre vehículos e peóns”, defende Seoane.
O BNG reclama transparencia sobre a empresa que xestiona o sistema
Outro dos aspectos centrais da iniciativa é coñecer en detalle como se xestiona o dispositivo.
O BNG solicita acceso ao contrato coa empresa privada encargada da captación de imaxes e videogravación, á documentación relativa ao tratamento dos datos asociados ás matrículas, ás características técnicas do equipo, á súa homologación e ás autorizacións correspondentes.
“Se o Concello utiliza un sistema que pode acabar nunha sanción económica para a veciñanza, debe existir a máxima transparencia sobre como funciona, quen o xestiona e que garantías ofrece”, sostén a portavoz nacionalista.
OS MELLORES ESTABLECEMENTOS
“Seguridade viaria si, pero con información e garantías”
O BNG insiste en que o debate non debe reducirse a estar a favor ou en contra das multas, senón a decidir que modelo de seguridade viaria se quere para Celanova.
“Queremos que se respecte o semáforo e que ninguén poña en perigo un peón ou outro vehículo. Precisamente por iso defendemos unha sinalización clara, medidas para reducir previamente a velocidade e un sistema transparente e tecnicamente garantido. A prevención ten que estar por diante da sanción”, conclúe Ernesta Seoane.
O Grupo Municipal levará a moción ao Pleno para reclamar que o Concello revise o actual sistema e adopte medidas que permitan compatibilizar o control das infraccións coa información aos condutores e coa mellora efectiva da seguridade viaria.
