- Lamentan non alcanzar un acordo na reunión mantida onte, na que mostraron un aumento do 13% en 3 anos, moi por encima doutros convenios no resto de España
- Os empresarios fan un chamamento á calma e piden respectar, do mesmo xeito que o dereito de folga, o dereito para ir a traballar e, sobre todo, a integridade física da persoa traballadora
A representación empresarial da negociación do convenio de siderometal, conformada polas asociacións de instaladores eléctricos, talleres de reparación, industria do metal e concesionarios de vehículos, estima que o seguimento do paro no primeiro día de folga indefinida convocada polos sindicatos está a ser ao redor dun 30-35%, e recalcan que algunhas empresas están a funcionar con total normalidade.
Doutra banda, desde a parte empresarial denuncian novamente incidencias e actuacións desproporcionadas dos piquetes, como impedir o acceso a moitos traballadores ao seu posto de traballo mediante altercados ou coaccións, sen respectar nin o dereito ao traballo nin á integridade física; accións que xa rexistraron na noite de onte impedindo a entrada de empregados á quenda de noite nalgunhas empresas. Nalgúns casos, comentan desde o sector empresarial, producíronse agresións entre os propios compañeiros de traballo. E aseguran que a violencia demostrada polos piquetes non só lles afasta dun esperado acordo, senón tamén da posibilidade de volver sentar á mesa negociadora, pois non poden pasar por alto a gravidade dalgúns feitos que, aínda que con carácter puntual, están a darse nalgunhas empresas.
Engaden ademais os representantes destas asociacións empresariais, que lamentan non alcanzar un acordo na reunión de onte, e resúltalles incomprensible que a parte laboral considere insuficiente un aumento por encima da media do que actualmente se está asinando noutras partes de España.
A proposta empresarial da reunión de onte – un 13% en tres anos – melloraba nun punto o anterior ofrecemento económico, que a parte laboral segue considerando insuficiente. En canto á reunión celebrada o martes, manifestan que esperaban un achegamento de posturas pois a porcentaxe que figura sobre a mesa non está a ser o habitual noutras negociacións colectivas en España, polo que manifestan a súa sorpresa pola negativa e lamentan a situación, xa que o esforzo pola parte empresarial está a ser innegable para ofrecer esta cifra.
Para finalizar, desde estas asociacións lembran que teñen moi presente a responsabilidade que lles obriga a chegar a un acordo e a unha firma -principal obxectivo de todo convenio colectivo- e confían en que isto se dea o máis pronto posible. Consideran que a situación de folga non beneficia a ninguén e por iso realizaron un gran esforzo para tratar de achegar posturas, obtendo con todo unha vez máis, a negativa por parte dos sindicatos.
Doutra banda, lembran desde a patronal do sector que igual de lexítimo que o dereito á folga é o dereito de acudir ao posto de traballo e, por encima de todo, á integridade física, polo que fan un chamamento á calma e piden que se respecte á xente que quere ir traballar para non lamentar agresións nin males maiores.
