A Garda Civil de Lalín detivo esta semana a unha familia do Irixo que estaba sendo investigada por varios roubos de xoias en igrexas. A muller, nada no Irixo, pasou hoxe a disposición xudicial, mentres que o marido e dúas das fillas foron postos en liberdade logo de tomarlles declaración; a outra das fillas atópase nun centro de menores en Ourense.
A operación, coñecida co nome de Oratoria, poñíase en marcha xa o pasado ano, cando na primaveira a Policía Xudicial da Garda Civil puxo en marcha un operativo de vixilancia a esta familia tralas probas recabadas que inducían á súa culpabilidade. Comezaron con seguimentos á muller, con balizas no seu vehículo e pinchando o seu teléfono móvil, ó tratarse da presunta cabecilla.
Os roubos consistían na substracción de xoias en igrexas en diferentes puntos de Galicia, que posteriormente eran vendidas. Os rexistros dentro da operación policial leváronse a cabo nunha vivenda no lugar de Bugalleira, no Irixo, onde tamén foi detida esta familia. Os primeiros roubos, que foron os que deron lugar á investigación, poducíronse en igrexas da zona, como por exemplo as igrexas de Lalín, Rodeiro e A Estrada; tamén houbo outros en Ribadavia, Amil, Chantada ou Cambados. Algúns deles leváronse a cabo polas noites, cando os templos estaban pechados, mentres que outros efectuáronse de día, aproveitando procesións e outras celebracións relixiosas.
Segundo a taxación estimada feita pola Garda Civil, os bens substraídos poderían alcanzar o valor de 170.000 euros. En canto ós investigados, cargaban na súa conta bancaria o diñeiro recibido pola venda dos obxectos de xeito fraccionado. A partida de maior valor que ingresaron foi de 4.000 euros.
