Un nutrido grupo de usuarias do Centro Integral de Servizos Sociais ‘Alvetus’ foi o encargado de elaborar as tradicionais figuras das piñatas que xa forman parte dende os seus inicios do programa de actividades da ‘Festa Mexicana de Avión’. Nesta ocasión, os deseños están baseados na popular serie “El Chavo del 8”, producida en México no anos 70 do pasado século e con ampla distribución ao longo dos países americanos e tamén en Europa. Así, personaxes míticos como Chespirito, Doña Florinda, Quico o La Chilindrina foron plasmadas en papel da abalorios polas mans das mulleres residentes en ‘Alvetus’.
Estas piñatas, unha vez recheas de doces, serán colgadas na praza maior de Avión, para que a cativada xogue a rachalas no decurso da celebración da ‘Festa Mexicana’, que acada a súa 19ª edición na tarde do vindeiro venres, 8 de agosto. Un evento no que se rende homenaxe á cultura do país que acolleu ás veciñas e veciños do municipio. Tal e como apuntaba a responsable da organización, Dolores Gabián, no acto de presentación, “é unha festa de agradecemento aos nosos emigrantes, que tanto teñen aportado, e, tamén ás novas xeracións de galego-mexicanos que sempre retornamos ao noso recuncho”.
O programa de actividades iniciarase ás 17,00 horas do venres día 8 coa apertura dos cinco restaurantes especializados en comida mexicana que estarán presentes: Sol Maya (Vigo), Mesón Mexicano (Ponte Caldelas), Rincón Azteca (O Carballiño), Pico de Galo (Compostela) e Catering Itacati (Cerdedo-Cotobade), “de xeito que cada un deles ofertará un prato único diferente á dos outros, ademais dun ampla variedade de postres típicos mexicanos”, indicou a organizadora.
Dende as 18,00 horas tamén haberá xogos para a cativada, e, a partir das 20,00 horas, nenas e nenos desfrutarán das devanditas piñatas. Ademais, non podían faltar os tradicionais corridos mexicanos a cargo de dúas agrupacións de mariachis.
