- Rexeitado en 2013 e en 2020, o proxecto da Mina de Doade (en Beariz, comarca do Carballiño), está promovido por Recursos Minerales de Galicia, SA e tramitado pola Consellaría de Economía e Industria.
- Poñemos os locais do Sindicato Labrego Galego a disposición do público para presentar alegacións contra a mina -prazo aberto até o 2 de setembro-.
[Anexamos audio con declaracións de Margarida Prieto Ledo, responsábel da Loita contra o Acaparamento de Terras no SLG-CCLL]
Galiza,6 de agosto de 2025. O pasado 18 de xullo publicouse no Diario Oficial de Galicia (DOG) o acordo do 10 de xullo de 2025, do Departamento Territorial de Ourense, polo que se someten a información pública o proxecto de explotación, o estudo de impacto ambiental e o plan de restauración presentados xunto coa solicitude de pase a concesión de explotación de 17 cuadrículas mineiras derivada do permiso de investigación de recursos da sección C) Alberta I número 4966.1.1, nos concellos de Beariz e Avión, provincia de Ourense, e A Lama, provincia de Pontevedra.
No Sindicato Labrego Galego-Comisións Labregas (SLG-CCLL) xa coñecemos este vello proxecto da Mina de Doade (en Beariz, comarca do Carballiño), promovido por Recursos Minerales de Galicia, SA e tramitada pola Consellaría de Economía e Industria. Levamos dende o ano 2013 loitando contra el. Naquel ano, xunto á asociación ecoloxista Verbo Xido, impartimos unha charla en Forcarei, xa que a mina, nun inicio, ía comezar na provincia de Pontevedra. Un dos temores máis grandes da veciñanza afectada por aquela “primeira versión” do proxecto, tiña que ver co impacto que tería a actividade mineira sobre os recursos hídricos da zona, porque as minas precisan utilizar cantidades inxentes de auga. Ademais, o impacto que tería a utilización de maquinaria pesada e a utilización de explosivos contribuiría a aumentar os efectos negativos da explotación mineira.”Este proxecto inicial comezou a alertar á poboación sobre todo polo impacto que ten nas augas e traídas. Logo, xusto cando se ía presentar na Consellería, desapareceu.”, declarou Margarida Prieto Ledo, responsábel da Loita contra o Acaparamento de Terras no Sindicato Labrego Galego.
No ano 2020, no Sindicato Labrego instámoslle a Medio Rural a emitir un informe contra a concesión mineira ao proxecto Alberta en Beariz e Avión. “En 2020, dixéronnos que se estaba tramitando na provincia de Ourense, pedimos información e foi cando nos decatamos de que efectivamente alí se estaba tramitando sen Declaración de Impacto Ambiental“, denuncia. “Cando nos puxemos a analizar toda a documentación vimos que no expediente había un informe doInstituto Xeolóxico e Mineiro de España que recollía que era frecuente que aparecesen radiactivos asociados. O que contén ese informe obrigaba xa a facer Declaración de Impacto Ambiental”, esclarece Prieto. O SLG, canda outros colectivos, advertímoslle á Consellería de Industria nos delitos que podía estar incorrendo ao tramitar un proxecto deste tipo sen a Declaración de Impacto Ambiental (DIA).
A partir de aí foi cando o proxecto mineiro apareceu denegado. “A desculpa foi o informe da Confederación Hidrográfica Miño-Sil“, sinala Prieto. Pero daquela no SLG xa alertabamos do grave impacto que ía causar o proxecto sobre a riqueza forestal e a actividade gandeira na zona. “A empresa estivo traballando para ter licencia social dende ese momento. Opóñenselle todas as comunidades de montes afectadas que xa están personadas. E hoxe veñen cun novo proxecto branqueado, avalado pola Xunta de Galicia, declarado estratéxico, ao que nos imos seguir opoñendo. É o mesmo co aval dunha administración que se pon claramente de parte dun proxecto que non está aínda avaliado, que está a información pública”, advirte a responsábel da Loita contra o Acaparamento de Terras no Sindicato Labrego Galego.
A Mina de Doade no actual 2025
En 2025 chega unha “nova” mina subterránea de litio e feldespatos en Beariz, declarada como proxecto estratéxico pola UE, en trámite de participación cidadá até o 2 de setembro, no medio da alerta veciñal por impactos ambientais e falta de transparencia. “No SLG valoramos, igual que en 2013 e 2020, que segue a ser un proxecto inviábel, que vai ter impactos irreparábeis no territorio e que ten relación con todos os proxectos que hai en Portugal. Non deixar de ser todo o mesma situación”, critica Prieto. Ademais, “estamos ante un proxecto fracción, é dicir, que comeza en Beariz pero logo vaise ir estendendo a outros territorios, por iso se fala de fases”. Denunciamos, tamén, o conflito de intereses co novo aporte da empresa mixta da Xunta RDG (recursos de Galicia) sendo o xestor Carlos Martínez, responsable até o ano pasado do proxecto Mina Doade do grupo SAMCA, do que fixo eco recentemente a plataforma SOS Suído Seixo.
Dende a nosa organización, Sindicato Labrego Galego, denunciamos que non se está a valorar, alén de todo o xa indicado, os impacto que a mina de Doade vai ter na agricultura e no territorio, xa non só en canto ao momento presente, senón de cara ao futuro. “Hai territorios nos que ao mellor neste momento non hai actividade pero pode haber no futuro, se o destrúes non”, subliña Prieto. Por outra banda, no contexto no que nos atopamos do cambio climático, o tema da auga é unha cuestión moi grave á que cómpre atender. “Non se está a reparar no consumo de auga deste tipo de explotacións e a contaminación que deixan estes proxectos, non se repara nos riscos das balsas -hai roturas de balsas todos os anos, non é certo que agora sexan balsas seguras e que non teñan perigo ningún-. Todos os anos rompen varias balsas no mundo”, afirma Margarida Prieto.
Por todo isto, dende o Sindicato Labrego Galego-Comisións Labregas amosamos a nova oposición á Mina de Doade (en Beariz, comarca do Carballiño), promovida por Recursos Minerales de Galicia, SA e tramitada pola Consellaría de Economía e Industria. Animamos á cidadanía a presentar alegacións contra este proxecto -prazo o aberto até o 2 de setembro- e poñemos a disposición do público para realizar este trámite todos os locais do Sindicato Labrego Galego –aquí mapa de enderezos-.
Como levamos facendo dende o inicio, situámonos ao carón da veciñanza afectada polo proxecto e apoiamos a Plataforma Contra a Mina Alberta SOS Suído Seixo. O pasado mes de abril estivemos en Doade, onde participamos nunha charla-coloquio, canda a veciñanza. E así seguiremos facendo esta fin de semana, 9 e 10 de agosto, nos actos que se organizan na mesma Casa do Pobo e animamos a toda a poboación a achegarse para coñecer de preto os efectos que esta mina vai ter no territorio.
