Os cidadáns que acudiron onte, martes 26 de agosto, á Casa do Concello do Carballiño para realizar xestións no Rexistro Xeral atopáronse coa porta pechada, según alerta o grupo municipal de Espazo Común. Dende esta formación política subliñan que “a oficina onde os veciños teñen o dereito e a obriga de rexistrar infinidade de documentos para relacionarse con tódalas administracións estivo toda a mañán sen funcionar”.
“Por suposto, non houbo explicación nin información algunha e a xente que chegou alí e se atopou coa situación tivo que dar volta e buscar alternativas. O goberno municipal PPSOE, co alcalde por accidente Pepe Castro á cabeza, non é quén nin de cumprir a obriga legal de manter este servizo aberto tódolos días hábiles”, apuntan dende Espazo Común.
E engaden que “non é doado imaxinar que houbera quen tivera que rexistrar algunha documentación no derradeiro día dun prazo legal, e polo tanto dar voltas innecesariamente por culpa dun Concello incapaz de exercer as máis básicas das súas responsabilidades”. “Faise urxente que o alcalde saia a dar explicacións por este feito e que se garanta que non se vai voltar a repetir unha situación semellante”, conclúen.Xa está ben de ir de desastre en desastre.
