A localidade de Leiro inicia xa mañá a programación de actividades da ‘XXXIV Festa da Vendima’, declarada de Interese Turístico de Galicia e que ten coma obxectivo render homenaxe á veciñanza do Ribeiro que se adica ao secular cultivo das vides e á producción de viños e dos licores derivados do bagazo das uvas.
Así, a cativada terá este sábado día 30 o seu protagonismo coa apertura dunha ludoteca e a celebración dunha gran festa infantil a partir das 18,00 horas, á que seguirá, ás 21,00, a inauguración da sexta edición da ‘Mostra de Viños’ dos adegueiros do municipio. A xornada rematará cun concerto de música en directo.
No día grande da celebración, o domingo 31, a Praza do Cruceiro converterase no epicentro dos actos, comezando ás 10,00 horas coa recepción e exposición dos acios de uvas que participan no concurso, e a lectura do pregón, prevista para as 12,00 horas, a cargo do secretario xeral do Partido Popular, Miguel A. Tellado Fidalgo, e tra-la benvida ás autoridades e convidados que terá lugar na Casa do Concello por parte do alcalde de Leiro, Francisco Fernández.
Seguidamente, partirá dende a rúa Gabino Bugallal o tradicional desfile de carrozas que están inscritas no certame deste ano, que acompañadas por grupos de charangas achegaranse ata o Campo da Feira. Na paraxe natural de O Salgueiral poderanse ver os vehículos participantes na ‘VII Concentración de Coches Clásicos’ e visitar o ‘XX Mercado Artesanal’, antes do xantar popular.
Na tarde do mesmo domingo, farase entrega dos premios aos gañadores dos certames de carrozas e acios, e desputarase o partido de fútbol veterano no estadio Luis Sobrino. Finalmente, a igrexa parroquial de San Pedro acollerá ás 20,00 horas o ‘Festival de Corais da Vendima’ e, xa pola noita, Roi Casal poñerá ás 22,00 horas o punto final ao festexo cun recital no Salgueiral.
