O PSdeG-PSOE de Leiro solicitou a dimisión do alcalde, Francisco José Fernández, tras considerar que incorreu nun incumprimento da normativa urbanística e realizou declaracións contraditorias en relación coa execución dun mural no centro cívico municipal.
Segundo os concelleiros socialistas Manuel Rodríguez e Pedro José González, durante a última sesión plenaria o alcalde recoñecería que o mural foi realizado sen a licenza urbanística requirida nin comunicación previa, algo que, segundo os socialistas, contradi o establecido na Lei do Só de Galicia. Dita lei esixe que calquera intervención, xa sexa pública ou privada, conte coa correspondente autorización.
Os representantes do PSdeG-PSOE subliñan a importancia de que os cargos públicos actúen con transparencia e respecto á legalidade, e consideran que este feito, sumado a certos comportamentos no pleno que cualifican de pouco propicios para o diálogo, afecta á confianza institucional.
Por iso, fixeron un chamamento ao alcalde para que asuma a súa responsabilidade e presente a súa dimisión, co obxectivo de preservar a normalidade democrática e garantir un goberno municipal baseado no respecto ás normas e aos cidadáns de Leiro.
