O PSdeG-PSOE de Ribadavia pregúntase que ten que agochar o alcalde do Partido Popular, César Manuel Fernández, no padroado da Vila Termal de Prexigueiro, tras case dous anos e medio de mandato sen convocalo. As e os socialistas esixen coñecer os motivos polos que non se convoca este órgano, que tal e como afirman “é vital para o funcionamento do motor económico e turístico máis importante da vila como son as nosas termas”.
Dende o grupo municipal socialista explican que no padroado están representados os diferentes grupos políticos da corporación, así como a veciñanza de Prexigueiro e o presidente do mesmo é o propio alcalde. Esta fundación ten como obxecto cumprir os pregos establecidos para que as termas funcionen mellor, fixar os prezos públicos e valorar posibles investimentos e melloras, dende que se puxo en marcha da man dun goberno socialista no ano 2010. Tal e como indican dende o PSOE de Ribadavia “a situación é de extrema gravidade, posto que no que levamos de mandato non se reuniu o padroado nin unha soa vez”.
As e os socialistas afirman que en tódolos plenos, os grupos políticos da oposición, “levan solicitando por activa e por pasiva que o alcalde convoque ao padroado da Vila Termal de Prexigueiro”, pero tal e como apuntan “este fai oídos xordos”. Ante esta situación, o grupo municipal socialista amosa o seu “malestar”, xa que tal e como indican “moito nos tememos que o rexedor está tratando de ocultarlle aos grupos e a veciñanza o que está acontecendo cas termas de Prexigueiro”. Asemade tamén lembran que a asociación de veciños que representa a Prexigueiro recibe un importante canon da concesión das termas e repercute no padroado, motivo polo que dende o PSOE cuestionan “quen ten que velar por eses cartos públicos?”.
“A día de hoxe non sabemos cantos cartos hai nas contas do padroado, nin que investimentos se van facer en Prexigueiro”, subliñan dende o PSOE, antes de afirmar que “a falla de transparencia é total e moito nos tememos que o PP ten algo que agochar en todo esta situación”. Neste senso as e os socialistas explican que a asociación de veciños “desfíxose recentemente”, pero sinalan que “como non se convocou ao padroado non se puideron renovar os órganos e creemos que detrás de todo isto atópase a man do alcalde, que como non pode manexar á veciñanza ao seu antollo, decidiu obviar as convocatorias do padroado”.
O PSdeG-PSOE de Ribadavia tamén pon o foco na ausencia “total” de subvencións para potenciar as termas da vila. Segundo explican “temos un alcalde que non xestiona, que non consegue recursos nin subvencións, e que pese a ser o vicepresidente da Deputación, ano tras ano comprobamos que namentres noutros concellos chegan cartos para o termalismo, en Ribadavia non entra un peso”. Neste senso, as e os socialistas destacan que “as termas son o gran motor económico da vila, cun atractivo moi grande e atópanse sempre cheas, pero precisan de novos investimentos e melloras e para iso é necesario atopar subvencións”.
Dende o grupo municipal socialista lembran que César Manuel Fernández “fartouse en vender que da súa man chegarían milleiros de euros en subvencións para a vila, ao ter gobernos amigos do Partido Popular na Xunta e na Deputación, pero a triste realidade é que non chega un só euro”. As e os socialistas pregúntanse “como imos conseguir axudas públicas para o termalismo, cando temos un alcalde que é incapaz de convocar ao padroado da vila termal?” e apuntan a que “moito nos tememos que non o convoque, ao igual que acontece co de deportes, por medo a perder as votacións ou a que lle recriminen a súa nefasta xestión”.
As e os socialistas tamén lembran que a Lei de Fundacións de Galicia esixe que se reúnan un mínimo dunha vez ao ano ás fundacións co obxectivo de dar contas, aprobalas e ver o estado no que se atopan estes órganos. Pois ben, no caso do padroado termal xa van máis de dous anos e medio sen convocarse, no que en palabras do PSOE ribadaviense “é unha mostra de que o alcalde incumpre a lei, cando debería coñecela tralo seu paso pola Xunta”. Neste senso tamén destacan que a situación é de tanta “desidia”, que ata o propio PSOE tivo que recordarlle ao concello quen era o seu representante no padroado.
