I O mercado solidario celébrase os vindeiros martes e mércores nas instalacións do Complexo Hospitalario Universitario de Ourense
28.11.2025. Durante todo o ano comparten horas, coñecementos e aprendizaxes nos obradoiros dos espazos +60 de Afundación en Ourense. E no mes de decembro, promoven unha tenda solidaria para axudar a entidades coma a delegación ourensá da Asociación Española contra o Cancro. Son as 36 persoas voluntarias de Ourense que participan no programa «O valor da experiencia» da Obra Social de ABANCA. A súa tenda solidaria deste decembro permanecerá aberta a vindeira semana, o martes e o mércores, día 2 e 3, das 10 da mañá ás 2 da tarde, nas instalacións do Complexo Hospitalario Universitario de Ourense.
Quen se achegue ao mercado solidario poderá atopar almofadas, manteis, bolsos, mandís, carteiras, ou produtos de nadal. Todos os artigos á venda están feitos de xeito artesanal nos obradoiros do programa de voluntariado. En moitos dos casos, para facer os produtos danlle unha segunda vida a materiais procedentes de prendas ou outros tipos de cousas usadas.
O exemplo da historia das almofadas
As almofadas solidarias para apoiar o brazo son un bo exemplo do traballo das voluntarias e voluntarios do Espazo +60 de Ourense. Confecciónanas artesanalmente a partir dun patrón e apoiando unha iniciativa nada nos Estados Unidos en 2001 para facilitar a recuperación de persoas que están sendo tratadas de cancro de mama. O deseño en forma de V das almofadas ten innumerables vantaxes: entre elas, as de evitar o roce do brazo e da ferida posterior á cirurxía, facilitar o descanso, ou protexer a zona do corpo que se está a recuperar.
OS MELLORES ESTABLECEMENTOS
O grupo de persoas maiores de 60 anos que participan en Ourense neste programa de Afundación colabora coa Asociación contra o Cancro dende 2001. Inicialmente, foi só en Ourense. Pouco despois, comezarían a levar a súa axuda tamén a Verín e O Barco de Valdeorras.
O nome do taller, «Obradoiro de Reciclaxe e Solidario», explicita un dos principios cos que traballan: empregan materiais reciclados nos traballos, implicando ao resto de socios e socias do Espazo +60 na recollida de elementos como teas, fíos ou botóns.
Persoas maiores activas
Esta actividade ten como finalidade o desenvolvemento de hábitos de reciclaxe e promove a creatividade e a imaxinación á vez que fomenta a solidariedade e a cooperación. Forma parte do programa «O valor da experiencia» da Área de Maiores de Afundación, que traballa para potenciar o papel activo dos maiores na sociedade e o desenvolvemento de actividades de voluntariado. As persoas socias dos espazos +60 de Afundación poden participar en actividades de voluntariado interxeracional, cultural e educativo, voluntariado social e comunitario e voluntariado ambiental.
O de Ourense é o primeiro dos mercados solidarios que as persoas que participan no programa «O valor da experiencia» de Afundación promoven neste decembro. Serán 5, en total, as tendas solidarias que se abran en Galicia: en Betanzos, Pontevedra, Ferrol e Viveiro, ademais de en Ourense.
O da cidade das Burgas é o obradoiro solidario máis antigo dos promovidos por Afundación. Naceu en 1998. Durante os tres primeiros anos da súa historia, apoiaban coa recadación do mercado solidario aos misioneiros ourensáns da Misión de Jipijapa, en Ecuador. Dende 2001, os fondos recadados destínanse á Asociación Contra o Cancro en Ourense. No pasado mes de outubro, as voluntarias entregaron almofadas solidarias no Complexo Hospitalario de Ourense e no Hospital de Verín.
