Este contrato, cun orzamento de case 12.000 euros, ten un prazo de execución duns tres meses
O proxecto ten como obxectivo a renovación do treito de tubaxe desde Pazos de Arenteiro á estación de tratamento de auga potable de Leiro
Estas actuacións resolverán os problemas de funcionamento que se viñan producindo nesta rede de subministro de auga
A Consellería de Infraestruturas e Mobilidade, a través de Augas de Galicia, vén de adxudicar a redacción do proxecto para mellorar o funcionamento do sistema de abastecemento do Concello de Leiro.
Este contrato, que foi adxudicado á empresa Diagrama Ingeniería Galicia S.L por un investimento de case 12.000 euros, ten un prazo de execución duns tres meses.
A intervención consistirá na renovación de tubaxe desde Pazos de Arenteiro á estación de tratamento de auga potable de Leiro.
As actuacións teñen como obxectivo resolver os frecuentes problemas de funcionamento que se veñen producindo neste treito de condución que abastece á ETAP e ao depósito de Leiro.
Para isto, no proxecto analizarase a situación actual destas instalacións e definirase o conxunto de actuacións necesarias para acadar a mellora na rede de subministro de auga neste municipio ourensán.
A Xunta, mediante estas actuacións, colabora cos municipios para resolver as súas carencias nas infraestruturas hidráulicas e proporcionarlles aos veciños un sistema de abastecemento que responda ás súas necesidades.
