A formación de Ribeiro en Común recorda que a crise da Covid-19 aínda está presente nas vidas dos cidadáns. Por iso reclámanlle ó Concello que actúe en consecuencia con esta preocupación social e reforce a través dunha campaña e de vixilancia policial o cumprimento de protocolos e da normativa das autoridades sanitarias.
Consideran dende a formación que o Concello non se pode relaxar na prevención e seguridade, aínda menos en horario nocturno e de fin de semana. Por iso reclaman que o Concello non se desentenda destas situacións que non respectan a convivencia veciñal e a seguridade pública, como afirman que está acontecendo no que vai de verán.
Ribeiro en Común asegura que son numerosas as queixas veciñais do casco histórico nas noites das últimas fin de semanas. Algunhas das que afirman que lle transmitiron foron ruídos graves a altas horas, festas privadas, e reunións en espazos públicos que incumpren tanto a normativa anti-ruídos como tamén as sanitarias de prevención anti-Covid19.
Por todo isto, a pasada fin de semana, Ribeiro en Común rexistrou unha petición para solicitar que o Concello establecera gardas nocturnas para as fin de semana, e que o Concello solicite aos responsables da Garda Civil a colaboración e a implicación nestas tarefas e funcións, pois dende a formación son coñecedores de que nestes momentos os recursos de Policía Local son limitados.
Desde o Concello, tanto goberno como oposición, cren que non poden permitir que casos illados empañen o bo comportamento e a enorme responsabilidade que está demostrando a inmensa maioría da nosa sociedade e da veciñanza de Ribadavia, así polo menos o faremos desde Ribeiro en Común.
