Dita petición non foi tida en conta polo Goberno Local de Barbadás, presidido polo socialista Xosé Carlos Valcárcel
O Grupo Municipal do BNG no Concello de Barbadás, solicitou a semana pasada a través dun escrito dirixido ao alcade, o cambio de data do pleno previsto para este luns, 8 de marzo, dado que coincide co día Internacional da Muller.
Tal e como afirmaban os concelleiros Sarín Núñez e Carlos González, o obxecto de dita solicitude é “para que poidamos asistir as distintas mobilizacións que se convocan desde a CIG e desde a Marcha Mundial das Mulleres para a celebración desta data, ao tempo que co adiamento, facilitábase o dereito das traballadoras do concello a poder facer folga “.
Os nacionalistas lamentan que o actual executivo de Barbadás non tivese en conta este feito á hora de programar a sesión plenaria ordinaria do mes de marzo, lamentando ademáis os argumentos esgrimidos polo Goberno Local á hora de xustificar o mantemento da data en que “ningún outro grupo solicitou dito cambio”.
Para o BNG, a implicación do Concello de Barbadás coa conmemoración do Día Internacional da Muller debe ir máis alá dunha mera declaración de intencións, polo que non comprenden a decisión de programar o pleno ordinario para ese mesmo día e sobre todo, os argumentos esgrimidos para xustificar o non adiamento do mesmo para o día seguinte.
