Os socialistas tamén avogan pola gravación das sesións plenarias en formato con imaxe e son para posteriormente aloxalos na web municipal para que a veciñanza “teña acceso á información”
A voceira do PSdeG en Castrelo, Catalina González, considera que “deste xeito” a veciñanza “poderá comprobar de xeito veraz as intervencións e opinións e sacar as súas propias conclusións”
O PSdeG-PSOE de Castrelo de Miño ven de presentar unha moción para o seu debate na que lle trasladan ao Concello unha proposta na que piden que se proceda a emitir en directo vía streaming os plenos municipais co obxectivo de permitir deste xeito o acceso “universal” de todos os veciños e as veciñas do municipio. As socialistas apostan tamén pola gravación de imaxe e son de tódolos plenos que se emitan a partir da data de presentación de dita moción e que posteriormente se suban a páxina web municipal, co fin de que a veciñanza “teña acceso á información” do que se debate nas sesións plenarias.
Dende o Grupo Municipal Socialista consideran que a través das gravacións das sesións cumprirase co “principio de transparencia”, permitindo que os veciños e as veciñas do noso municipio teñan total acceso a información que afecta o seu concello. O PSdeG de Castrelo afirma que a hora fixada para a celebración dos plenos “non permite á veciñanza” asistir e ser informados “debidamente” e apuntan que con estas gravacións deixara de verse afectado un dos piares fundamentais dos plenos municipais, “a transparencia”.
Para a voceira socialista en Castrelo de Miño, Catalina González Álvarez, a emisión en streaming e a gravación dos plenos e posterior subida á páxina web municipal “é algo habitual en numerosos concellos do panorama nacional” e apunta a que “non importan as siglas do goberno”, xa que hai concellos tanto de PSOE, como de PP ou BNG que “xa teñen a disposición da veciñanza este servizo”.
Para González Álvarez con estas gravacións e emisións en directos non só se lle facilita o acceso a información á veciñanza, senón que esta “tamén pode comprobar de forma veraz as intervencións e opinións manifestadas nos plenos polas diversas formacións políticas e sacar as súas propias conclusións, sen que estas veñan xa fiscalizadas polas informacións facilitadas polos diferentes partidos”.
Os socialistas agardan contar cun respaldo unánime nunha cuestión que consideran “prioritaria” e que afirman que “mellorará a difusión da actividade política no municipio”. O Grupo Municipal Socialista apunta tamén a que “nos plenos non só se debate sobre cuestións municipais, senón que se aproban obras, melloras, orzamentos ou modificacións que afectan no seu día a día os nosos veciños e as nosas veciñas”.
