O presidente do goberno provincial afirma que esta “persecución sectaria e partidista” terá en fronte á Deputación de Ourense, que seguirá defendendo os intereses de autónomos e pemes da provincia, moito máis nesta etapa de grave crise sanitaria, económica e social”
O presidente da Deputación de Ourense, Manuel Baltar, denunciou hoxe que o grupo socialista na institución provincial “pon nome e apelidos en sede xudicial a autónomos que cobraron axudas da Deputación”, e afirma que esta “persecución sectaria e partidista” terá en fronte á Deputación de Ourense, “que sempre defendeu, e o seguirá facendo, os intereses de autónomos e pemes da provincia de Ourense, moito máis nesta etapa de grave crise sanitaria, económica e social que estamos a padecer e onde as palabras “axuda” e “cooperación” deben ser a máxima expresión dunha solidariedade que para o grupo socialista brilla pola súa ausencia, tendo en conta que persiste na súa teima por xudicializar unhas axudas, pretendendo así que os autónomos da provincia non poidan dispoñer delas”.
As axudas directas supuxeron unha achega total de máis de tres millóns de euros (3.163.120 €) tanto para pemes (518.000 €) como autónomos (2.644.800 €), e tiveron como obxectivo apoiar a autónomos e pequenas e medianas empresas da provincia de Ourense de 91 concellos (todos agás a capital, os que teñen unha poboación menor a 20.000 habitantes), “para colaborar desde a Deputación á necesaria reactivación económica trala crise provocada pola pandemia do COVID-19, que máis dun ano despois aínda segue a danar gravemente social e economicamente á nosa sociedade e ao seu tecido produtivo”, afirma Manuel Baltar.
Na rolda de prensa que o presidente Baltar ofreceu hoxe no Pazo Provincial referiuse á resolución xudicial do pasado 8 de xullo, asinada polos representantes do PSOE na Deputación co seu portavoz á cabeza, Rafael Rodríguez Villarino, “nun absoluto exemplo de inquina, odio, rencor e frustación, cometendo a maior torpeza persoal e política que pode facer calquera representante público, indo contra quen crea riqueza e emprego na provincia, como así o reflicten as citacións xudiciais recibidas estes días”.
O presidente lanzou unha mensaxe de “solidariedade e respaldo incuestionable” aos autónomos ourensáns, ante “a incompresible, vergoñenta e indignante actitude do grupo socialista na Deputación, que non só recorreu estas axudas, senón que ademais tamén votou en contra”. A Deputación, dixo, “estará sempre cos autónomos, tamén agora, nun momento especialmente sensible polas novas restricións, e a ningún representante da corporación se lle ocorrería esta maldade, agás a estes nove deputados, pola estratexia errática do seu máximo responsable”.
A Deputación de Ourense, subliñou, converteuse no seu momento na institución provincial máis social da historia, “pero o PSOE meteu paos na engrenaxe da institución facendo gala da súa falta de empatía, dunha malísima oposición, narcisista e egoísta, arremetendo contra as primeiras axudas habilitadas por un goberno provincial, áxiles, con burocracia cero e con total dilixencia por parte do persoal da institución, axudas que recibiron todos aqueles que a pediron”.
En concreto, a Deputación concedeu 5.090 axudas por importe de 3.163.120 euros. Desta contía, 2.644.800 euros foron destinados ás 4.408 solicitudes presentadas por autónomos, que percibiron 600 euros cada un. O resto do importe, 518.320 euros, cubriu as 682 solicitudes presentadas por pemes, a razón de 760 € por empresa.
O mellor e o peor da pandemia
“Situacións como esta pandemia -abondou Baltar- poñen ao descuberto o mellor de cada pobo e cada persoa, neste caso as nosas empresas que seguen loitando, pero tamén o peor que, sen dúbida, é o comportamento e a actitude que aínda hoxe, dun xeito incrible, mantén Rodríguez Villarino”. Lembrou neste punto que todo comezou cunha denuncia verbal por parte do portavoz socialista diante da Subdelegación do Goberno, que á súa vez puxo en marcha a maquinaria para ver se a Avogacía do Estado suspendía estas axudas, converténdonos no único caso en Europa, no que a día de hoxe está recorrida unha iniciativa destas características.
“Mentres Sánchez vende a España como unha nación emprendedora, o seu discípulo en Ourense destrúe as nosas empresas e autónomos, nunha actitude que podería definirse como o Doutor Rodríguez e Míster Villarino, xa que recorre na Deputación o que solicita no Concello de Ourense como oposición, e pide máis axudas a comerciantes no último pleno provincial”, afirmou Baltar, engadindo que a oposición “debe ter capacidade de construír e aportar ideas, pero Rodríguez Villarino só entende este labor coa palabra “contra”: contra o seu partido, contra os seus militantes, contra quen rexen as institucións e contra da xente á que lle di, por unha banda, que virán medidas de apoio e logo as recorre, citando agora para novembro en sede xudicial a beneficiarios das axudas”.
Baltar remarca que esta “é unha estratexia descoñecida na política mundial e que ten resultados que están á vista de todos, como nas autonómicas de hai un ano no que o partido socialista foi a terceira forza política na provincia e tamén no Concello de Ourense que presuntamente lidera o señor Villariño, aínda que sei que non todos os deputados e deputadas deste grupo provincial, e mesmo alcaldes e alcaldesas socialistas, están de acordo con este plantexamento absurdo e antinatura”.
Fronte a todo isto, detallou o presidente Baltar, a Deputación de Ourense, trala constitución do Comité do Día Despois en plena pandemia, “converteuse na primeira institución provincial española en habilitar estas axudas, continuando o seu compromiso cos sectores máis afectados a través da achega de 790.000 euros, é dicir, o 1 % do orzamento total da Deputación, para o fondo conxunto de apoio á hostalería da Xunta, e 150.000 euros máis destinados ao bono turístico”. Tamén citou o programa EmprendOU, para a posta en marcha de iniciativas de autoemprego no medio rural, “que xa supera os cen casos de xente nova que aposta por quedarse no seu territorio”, ou a recente presentación da estratexia para a captación de fondos europeos no marco financeiro plurianual 2021-2027, “onde todos os grupos fixeron as súas achegas agás os socialistas, que non participaron en ningunha reunión”, concluíu Manuel Baltar.
