A mocidade poderá acceder ao sistema de autocita a través da súa tarxeta sanitaria ou do seu DNI

Recoméndase ás mozas e mozos pertencentes a unha mutualidade que se aseguren de ter rexistrado o seu DNI nos datos da mutua correspondente

Os medios de acceso serán: a través do ordenador o enderezo cita.sergas.gal e o portal E-Saúde e a través do teléfono na APP Sergas móbil

AVANTAR ACTIVIDADES

O sistema de autocita que abrirá de novo dende as 9 horas do sábado 7 de agosto e ata as 23,30 horas do domingo 8 terá dúas posibilidades de acceso: a través da introdución do número da tarxeta sanitaria ou, en caso de persoas que non sexan usuarias da asistencia sanitaria do Sergas, a través do seu número de DNI.

No caso das mozas e mozos pertencentes a unha mutualidade, e que por tanto non dispoñan de tarxeta sanitaria do Sergas, recoméndase que se aseguren de que a mutua ten rexistrado o seu DNI, pois só estarán habilitados para entrar na autocita aqueles números de DNI que fosen trasladados á Xunta polas distintas mutualidades.

No referido aos medios tecnolóxicos dispoñibles, lémbrase a solicitude de autocita pódese facer dende un ordenador no enderezo: cita.sergas.gal, ou no portal de saúde do Sergas (É-Saúde). Tamén pódese solicitar dende un teléfono a través da APP Sergas móbil.

Esta fin de semana o sistema de autocita permitirá asignar un total de 25.000 doses para os nacidos entre os anos 2000 e 2005, que se vacinarán a vindeira semana. A Xunta de Galicia quere así seguir progresando no proceso de vacinación dos grupos nos que o virus ten máis incidencia. Así, dende o dia 22 iniciou a vacinación do grupo de 29 a 20 anos, no que xa se avanzou considerablemente. Ademais, púxose en marcha a autocita entre os adolescentes, na que, inicialmente, dispúxose de 5.000 doses e 11.000 na segunda apertura.

Ademais, estase a citar por SMS a todos os cidadáns nacidos no ano 1999 e anteriores, e continúa aberta a autocita para os maiores de 40 anos.