AplataformaSTOPEÓLICOSXURÉS-CELANOVAreuníu este sábado nunha mobilización de protestas contra a invasión eólica a máis de medio cento de veciñas, alén das que acompañaron à saída diante do Mosteiro de Celanova a primeira hora da mañá.
Máis de vinte asociacións e colectivos –entre elas, clubs deportivos, entidades veciñais como as de Vilanova dos Infantes e Ramirás, os Comités de Memoria Histórica da Comarca de Celanova e do Val do Limia, grupos ecoloxistas como Verdegaia, Adega, Amigos da Terra (que se sumou á andaina) e plataformas que loitan contra a invasión eólica en todo o país– apoiaron a I MARCHA EN DEFENSA DA AUGA, A PAISAXE E O PATRIMONIO DA CASA DA NEVE na que tomaron parte máis de medio cento de veciñas da comarca, das terras da Baixa Limia e outras, así como algúns veciños que arrouparon aos participantes na saída.
A MARCHA partiu da Praza Maior de Celanova, diante do Mosteiro, e subiu precisamente ao catalogados como “lugares primitivos da fundación” do Mosteiro e da vila: o chamado Monte da Casa da Neve, onde unha empresa con sede en Alemaña pretende chantar un polígono eólico que convertería en terreo industrial máis de 500 hectáreas de prados e bosques, con 7 aeroxeradores de 180 metros de alto, visíbeis desde toda a contorna e aproveitando as facilidades que concede a normativa vixente para levantar unha instalación industrial a menos de 1 quilómetro das poboacións, algo que estaría prohibido en Alemaña.
No alto do monte, desde a chaira coñecida como Pozos da Lagoa, onde aínda non hai tantos anos emerxía a auga no inverno, os participantes foron guiados por Xosé Benito Reza, ex director xeral de Conservación da Natureza no goberno galego 2005-2009, e polo arqueólogo Davide Pérez, que sinalaron os impactos ambientais e patrimonios que ocasionaría o plan da empresa no caso de executarse. Visitáronse os lugares do neveiro da Casa da Neve, os restos da mina romana a ceo aberto, e a área que domina todo o val onde estudos recentes sitúan a Casa Grande da familia de San Rosendo e as Torres de Velbís. E tamén se indicaron os lugares de abundante presencia de mámoas no que os informes arqueolóxicos vén unha continuade do conxunto megalítico do Laboreiro.
Na marcha participaron veciñas de Bande, Muíños, Cartelle, Ramirás, A Merca, Ourense, Verea e Celanova, e algúns representantes políticos, como a parlamentaria do BNG, Noa Presas, e o concelleiro nacionalista en Celanova, Leopoldo Rodríguez, así como membros de colectivos ecoloxistas, como Amigos da Terra e Amigos das Árbores, integrados na Rede Galega Stop Eólicos na que a plataforma STOP EÓLICOS XURÉS-CELANOVA ten solicitado a súa inclusión. A última hora, tamén enviou a súa adhesión o colectivo de Mulleres Rurais As Pegureiras de Allariz, sumándose aos vinte e cinco colectivos que poden consultarse no cadro anexo.
STOP EÓLICOS XURÉS-CELANOVA agradece a todas o seu apoio e o esforzo dos participantes, e continuará as súas actividades presentando alegación á LAT do Xurés, que abre a porta a dous polígonos eólicos nos límites da Rede Natura en Baltar, e que (no caso da LAT) invade directamente a área de protección en Calvos de Randín e Muíños.
