Sae á rúa o novo número de Mazarelos. Revista de Historia e cultura.

Sae á rúa o novo número de Mazarelos. Revista de Historia e cultura. Nesta nova entrega a artista Lucía Escrigas pon a cuberta a un número variado e con moitas novidades. Arranca a revista Philip D. Webb cunha reflexión sobre a novela histórica da migración galega, seguido por unha lembranza ao artista lucense Luis Ferreiro Peinó escrito polo seu fillo e o seu neto Xose Luis e Brais. Seguidamente, unha escolma de artigos de investigación que van dende unha análise arqueolóxica ás necrópoles altomedievais galegas até un repaso aos obstáculos e barreiras que tiveron que enfrontar os republicanos tralo golpe do 36. Todo isto pechado pola entrevista ao catedrático da USC Isidro Dubert e á investigadora da UDC Antía Pérez Caramés sobre avellentamento, políticas de migración e sobre os mitos da estrutura poboacional de Galicia.

RESUMO DO NOVO NÚMERO
Existiron no tempo diferentes formas de marchar. Os que finaron e descansaron sobre a propia pedra; os que marchaban ao Novo Mundo ao soño das Américas, como faría Silvano; ou os que fuxiron cara Europa ante unha persecución que atentaba contra as súas propias vidas. Pero tamén hai memoria e novas correntes que lembran aos que esculpiron a realidade doutro tempo e os espazos que nos axudan a recordar aos que marcharon. Todo isto e moito máis na nova Mazarelos, coa capa de Lucía Escrigas e as reflexións de Isidro Dubert e e Antía Pérez Caramés na entrevista.
ÍNDICE
Silvano en Asunción. Unha memoria do real e do irreal 
| Philip Duncan Webb
“Unha ficción que non ten case nada de ficción a pesar de ser totalmente ficticia”. A emigración na novela histórica protagonizada por Silvano e contada por Philip no que se aprecian obstáculos e dificultades que os que marcharon tiveron que sufrir.

Entre gubias e labras. O escultor Luis Ferreiro Peinó no seu centenario | Xose Luis Ferreiro Carballido e Brais Ferreiro Ares
Nesta ocasión o persoeiro vai adicado a Luis Ferreiro Peinó. O seu fillo e o seu neto recuperan a memoria deste artista lucense aos cen anos do seu nacemento que aínda ten moito que contar.

Publicidade Premer na Imaxe

Necrópoles altomedievais galegas. Unha análise arqueolóxica (séculos VI-XI) | Martín Pérez Vale
Como era o tratamento dos mortos nas sociedades do pasado? Sartegos, necrópoles e tumbas altomedievais galegas da man de Martín para comprender os seus elementos definitorios.

As covas do Monte Galiñeiro. Interpretación do patrimonio inmaterial | Carlos Xabier Ares Pérez
As pedras teñen nomes, nas covas aínda se poden escoitar voces e os montes conservan a súa propia memoria. Cóntanolo Carlos a través do caso do Monte Galiñeiro e do gran valor inmaterial que este lugar arraiga na xente que con el convive.

Auxe e caída da morte (do outro) | Jose Manuel Suárez García
Un destino do que ninguén pode escapar, pero no que ao longo do tempo mudou segundo as sociedades cambian. Jose cóntanos neste artigo como era morrer antano, o que marcha e o queda atrás; pero tamén as memorias e as súas fallas.

Os camiños do exilio español. Do golpe de estado de 1936 aos campos de concentación europeos | Alba Garrido Fernández
A persecución ideolóxica levou a centos de milleiros de republicanos a buscar a salvación máis alá das fronteiras españolas. Alba reflexiona sobre as traxectorias e experiencias vitais refuxiados que aterraron nos campos de concentración europeos.

Un selfie autoetnográfico. Escribindo e camiñando cara a aldea cosmopolita | Lucía Álvarez Borrajo
Un exemplo de escritura performativa dende Leiro e cara o mundo. Lucía reflexiona sobre a xestión do territorio e da paisaxe a través da experimentación con metodoloxías artísticas.

Conversa con Isidro Dubert e Antía Pérez Caramés | Miguel Rodríguez Martínez e Roque Sanfiz Arias
Sobre a desmitificación de tópicos sobre o envellecemento demográfico, as políticas de retorno, o alarmismo e moito máis falan Isidro Dubert e a Antía Perez, invitados para a conversa deste novo número.

Nordés, ou como as diferenzas xeran correntes asociativas | Leticia Breijo Fernández e Luis Real Baltar
A asociación Nordés Faladora é un exemplo caro de como dinamizar a sociedade galega mediante actividades culturais e relacionarse co patrimonio local. Desta volta Leticia e Luis cóntannos como reactivaron o entorno e a veciñanza.