Por motivos de xestión, a organización dos Premios Arenteira tomou a decisión de mudar a data e a ubicación da gala de entrega de galardóns. En primeira convocatoria estaba prevista para este venres, día 26 de novembro, nas instalacións do ApartaHotel Arenteiro. Por motivos de organización, o evento será trasladado ó sábado, día 27 de novembro, e terá lugar no Auditorio Municipal Manuel María do Carballiño, ás 20:00 horas. Igualmente, o evento será retransmitido en directo a través da páxina web de Badal Televisión.
Recordamos cales foron os galardoados deste ano, escollidos polo xurado cunha votación en unanimidade.
Na modalidade de Cultura e Investigación, don Xosé Carlos Sierra. O xurado destaca así a súa labor durante máis de 25 anos á fronte do Museo Etnolóxico de Ribadavia, como director do Museo das Peregrinacións de Santiago de Compostela e o seu rol na creación do Museo do Viño de Galicia. Na nosa contorna, colaborou na creación do PArque Etnográfico do Carballiño.
Na modalidade de Deportes, o premiado é o Club Deportivo Arenteiro. O xurado valora a traxectoria seguida nos 63 anos de existencia levando o nome do Carballiño pola xeografía galega e estatal, conseguindo ademais este ano o ascenso a Segunda Federación e xogando a Copa do Rei fronte a equipos de categoría nacional de Primeira División. Ademais, xestiona o fútbol base, onde dende moi cativos comezan a súa progresión como futbolistas centos de rapaces da vila e da comarca.
A título póstumo, a Arenteira premia a Héctor Guzmán. Nado en México, está estreitamente ligado ó Carballiño, no eido labora da fotografía e da comunicación. Fíxose un habitual das exposicións fotográficas do Outono Fotográfico ourensán e intégrase no colectivo carballiñés O’Potiños. No Carballiño instala a súa residencia habitual e pasa a formar parte do equipo técnico de Radio Carballiño Cadena-Ser.
