A Comisión de Saúde Pública segue avanzando en canto a alixeirar as restricións relacionadas coa covid-19. Deste xeito, dende o próximo luns, póñense en marcha algunhas novidades. Todos aqueles cidadáns que sexan positivos en covid-19 pero sexan asintomáticos, non terán que facer corentena. Coma sempre, hai excepcións: as persoas vulnerables, os residentes en centros de maiores deberán illarse durante sete días, os ingresados en hospitais, independentemente da sintomatoloxía, e os sanitarios cuxa corentena rematará cando dean negativo nunha proba diagnóstica.
As corentenas para contactos próximos dunha persoa infectada, se fose vacinada, elimináronse en Nadal e para o resto da poboación o 1 de marzo.
A partir do luns, a vixilancia centrarase nas persoas con factores de vulnerabilidade. No resto de circunstancias, serán os médicos os que decidan se un paciente con síntomas leves de covid debe someterse a unha proba diagnóstica, aínda que as probas seguirán estando a disposición de calquera persoa nas farmacias.
