O PSdeG-PSOE de Viana do Bolo interésase na Deputación de Ourense polas obras da estrada de Santo Agostiño, que se están levando a cabo na actualidade e sobre a que realizaron varias preguntas ao presidente do ente provincial, Manuel Baltar. Os e as socialistas congratúlanse de que o arranxo avance a bo ritmo e que segundo as palabras do presidente as obras “estarán rematadas o vindeiro 24 de outubro”.
Dende o Grupo Municipal Socialista subliñan que “despois de anos pelexando polo arranxo dunha estrada que se atopaba nunhas condicións lamentables, por fin vaxa ser realidade o fin das obras e o acondicionamento desta estrada, tan necesaria polo alto volume de vehículos que circulan a diario pola mesma”. As preguntas realizadas de xeito oral no pleno da Deputación de Ourense, polo deputado provincial socialista, Aurentino Alonso, son unha continuación das diferentes iniciativas levadas a cabo polos socialistas nos últimos tempos, tales como a moción para crear unha comisión que negociase coas partes interesadas, a celebración dunha andaina reivindicativa e a presión feita para arranxar a estrada.
O PSOE vianés agarda que a data comprometida polo presidente da Deputación de Ourense para o remate das obras “sexa unha realidade e a veciñanza de Viana poida ver cumprida dunha vez por todas, o arranxo desta estrada”. Os e as socialistas fan fincapé en que “gracias a labor do PSdeG-PSOE o arranxo da estrada de Santo Agostiño é hoxe unha realidade, despois de moito tempo loitando porque se cumprira esta demanda histórica e tras conseguir o compromiso de todas as partes implicadas”. Neste senso tamén destacan que “xa quedan poucos días para o remate dun sono polo que levamos anos pelexando”.
A Agrupación Socialista de Viana confía en que o anuncio público feito por Baltar no pleno da Deputación de Ourense “sexa realidade na data anunciada”, pero sinalan que “o estado no que se atopan as obras non nos invitan a un excesivo optimismo”. Segundo relatan “comezouse co asfaltado e están preto de rematar co arranxo de cunetas e sumidoiros, máis aínda quedan días para rematar con estes traballos”.
Os e as socialistas preguntaron no pleno da Deputación sobre cal era a data prevista para a finalización das obras, na que o presidente respondeu que rematarían o 24 de outubro. Tamén fixeron fincapé en se se lle concedera a empresa adxudicataria unha prórroga para o remate das obras, e Baltar respondeu que “non, pero que estas foran paralizadas entre o 18 de novembro de 2021 e o 13 de abril de 2022”. Aurentino Alonso tamén preguntou se habería algunha outra actuación no 2023, ao que presidente da Deputación de Ourense respondeu que “non hai máis actuacións previstas”.
