O presidente do goberno provincial, Manuel Baltar, mantivo un encontro cunha delegación da entidade municipalista brasileña no que abordaron cuestións centrais coma as políticas públicas de igualdade
Ourense, 18 de novembro de 2022.- A Deputación de Ourense e a Confederaçâo Nacional de Municípios (CNM) do Brasil estudan liñas de cooperación arredor de avanzar en políticas públicas máis eficaces no “desenvolvemento humano, social e económico das comunidades locais”, en materias clave como as políticas de igualdade.
O presidente da Deputación, Manuel Baltar, mantivo un encontro no salón de plenos do Pazo Provincial con Tania Ziulkoski, representante do CNM e presidenta do Movemento das Mulleres Municipais, xunto aos consultores xurídicos do CNM Ricardo Hermany e Elena Garrido. A delegación da Confederaçâo Nacional de Municípios estivo acompañada na súa visita a Ourense pola alcaldesa de Lobios, María del Carmen Yáñez, e o profesor da Universidade de Santiago de Compostela Marcos Almeida.
Manuel Baltar puxo en valor a importancia desta futura colaboración -“coa que seguimos apostando polo traballo en rede, con froitos especialmente valiosos para Ourense”- mentres destaca “a importancia de encontros como este para intercambiar experiencias e coñecementos en materias tan importantes como son as políticas públicas de igualdade”.
O presidente da Deputación agradeceu a oportunidade de “afondar na realidade política brasileña”, nunha xuntanza na que tamén “puidemos expoñer os nosos avances desenrolados nos últimos anos nesta e noutras cuestións que forman parte da política global”.
Pola súa banda, Tania Ziulkoski recoñeceu a dispoñibilidade da Deputación e do seu presidente, Manuel Baltar, a participar dunha reunión da que “extraemos valiosas experiencias e coñecementos”.
Compartir experiencias e coñecementos
A Deputación de Ourense e a CNM, como institucións que teñen como razón de ser a asistencia e cooperación cos municipios para garantir a súa maior e máis efectiva autonomía, coinciden en debuxar canles de cooperación para o intercambio de experiencias e coñecemento.
Ambas institucións sinalan intereses comúns en materias como a Axenda 2030, que requiren de alianzas estratéxicas para a súa consecución. Manuel Baltar e Tania Ziulkoski valoran que “o intercambio de coñecementos e de experiencias sobre diferentes políticas e iniciativas publicas, ideadas e executadas dende distintas cosmovisións, é o instrumento decisivo para o avance máis rápido e seguro na obtención de máis e mellores resultados nos Obxectivos de Desenvolvemento Sostible”.
