O Marcos Valcárcel acolle dende mañá a exposición fotográfica “Abeirados”, de Xosé Manoel Rodríguez

O Centro Cultural Marcos Valcárcel albergará dende mañá, 9 de marzo, ao vindeiro 9 de abril a mostra fotográfica “Abeirados”, un ensaio visual realizado por Xosé Manoel Rodríguez que recolle imaxes de espazos públicos nos que se lembra ás persoas vítimas dalgún accidente ou sinistro mortal. 

“Abeirados” xorde dun traballo documental realizado nestes últimos doce anos ao longo do territorio galego, con especial protagonismo ourensán, e que serviu para obter unha serie de imaxes cun forte significado. 

AVANTAR ACTIVIDADES

O obxectivo da mostra é reflectir un costume secular de Galicia, mais tamén universal, como é a lembranza dos finados nos espazos públicos, especialmente a través deses fitos colocados na beira das estradas -de aí o nome da iniciativa- que evocan sinistros mortais de moi diversa índole -dende accidentes de tráfico a episodios violentos ou naufraxios-. 

O seu creador explica que foi un proxecto desenvolvido sen présa, esquecéndoo e volvendo a el en diferentes etapas durante este tempo, e fuxindo daqueles lugares convertidos en símbolos da traxedia por episodios recentes de carácter colectivo. 

Este ensaio fotográfico é, polo tanto, un percorrido por todos eses espazos que recordan pasamentos accidentais e que se espallan polas estradas, cantís ou congostras, constituíndose en monumentos íntimos con grande capacidade de transmisión de cada pequena ou gran historia.

As imaxes que forman a base documental foron realizadas por Xosé Manoel. Ademais do apoio da Deputación de Ourense, tamén participaron na conformación do proxecto da exposición e o catálogo Xosé Enrique Acuña, Xulio Gil e a produtora ourensá Visual Q.