I Comisariada por Mercedes Rozas, a retrospectiva percorre a traxectoria dun creador senlleiro, a partir dunha escolma de setenta obras procedentes de coleccións públicas e privadas de toda Galicia
I Esta exposición enmárcase no apoio de Afundación ao tecido cultural galego difundindo a obra na que tanto creadores clásicos como contemporáneos dan forma ao pensamento e interpretan a realidade e a cultura
21.03.2023. Afundación inaugura esta tarde, martes 21 de marzo ás 19.00 h, na Sala de Exposicións Afundación Ourense, a mostra antolóxica «Acisclo. Sete décadas», na que, baixo o comisariado de Mercedes Rozas, se percorre a traxectoria dun dos creadores máis senlleiros de Galicia, a través dunha escolma de setenta pezas procedentes de coleccións galegas públicas e privadas. Ao acto acudirán Xosé Carlos Caneiro, vicepresidente de Afundación; Acisclo Manzano, escultor; e Mercedes Rozas, comisaria.
Imaxes dispoñibles aquí:
https://drive.google.com/drive/folders/1dWkbiuwiJWSAfxR9JBZyqaT4hseuhtbT?usp=share_link
| Evento | Inauguración oficial de «Acisclo. Sete décadas» |
| Lugar | Sala de Exposicións Afundación Ourense |
| Data e hora | Martes, 21 de marzo, ás 19.00 h |
| Asistencia | Acisclo Manzano, creador Mercedes Rozas, comisaria Xosé Carlos Caneiro, vicepresidente de Afundación |
A exposición «Acisclo. Sete décadas» percorre a traxectoria artística deste escultor ourensán da man dalgunhas das súas pezas máis significativas cunha selección que visibiliza o seu compromiso coa arte, á vez que traslada a evolución do seu discurso afastándose progresivamente da representación naturalista, fuxindo da realidade obxectiva, que tan só mantén como pretexto de recursos estéticos.
Comisariada por Mercedes Rozas, preséntanse pezas de distintos materiais, cos que o autor explora novas texturas e diferentes posibilidades expresivas, así, a madeira, a terracota e o bronce falan da súa vinculación co orgánico, co románico do Mestre Mateo e co clasicismo de Fidias.
Acisclo Manzano está considerado un dos grandes escultores españois. Desde que no ano 1962 recibiu o Premio Nacional de Escultura e a Medalla de Ouro das Artes, a súa traxectoria foi obxecto de numerosos recoñecementos e premios. Nos anos sesenta integrouse no grupo O Volter xunto con Xaime Quessada e Xosé Luís de Dios, unha época de fecunda relación con Otero Pedrayo, Vicente Risco, Julio López Cid e Eduardo Branco Amor.
A súa escultura moveuse esteticamente dentro do universo figurativo, aínda que nalgúns momentos da súa carreira chegou a aproximarse ao territorio da abstracción.
«Acisclo. Sete décadas» inicia o seu percorrido cos traballos en madeira dos anos sesenta, e termínao cos máis actuais. En total 70 pezas provenientes de coleccións particulares de toda Galicia, tamén do propio artista, e mais da Colección ABANCA, Colección Afundación, Colección da USC, Parlamento de Galicia, Deputación de Ourense e Museo Quiñones de León.
A Colección de Arte Afundación achega á exposición catro pezas de moi diferente perfil seleccionadas pola comisaria: desde as madeiras Frei Escoba e o retrato de Xaime Quessada, datadas na primeira época do escultor (anos sesenta) ata as terracotas Repouso, un torso feminino insinuado de finais dos anos oitenta e Amores vesánicos, unha peza rotunda e vagamente antropomorfa dos anos setenta.
A exposición enriquécese coas fotografías de Mani Moretón que permiten traer á sala de exposicións traballos de Acisclo que, ben por ser escultura urbana, ou ben polas súas dimensións, non poden ser mostradas doutra forma: o Cristo Negro da capela das Neves na catedral basílica de Ourense, a Ninfa do Miño en Ourense, a Deusa do Deza en Lalín, ou o baixorrelevo Calpurnia Abana na Fonte das Burgas de Ourense, entre outras pezas.
Esta exposición enmárcase no apoio de Afundación ao tecido cultural galego difundindo a obra na que tanto creadores clásicos como contemporáneos dan forma ao pensamento e interpretan a realidade e a cultura.
Esta mostra enmárcase no programa social «Cultura por alimentos», que anima ao público visitante a realizar a súa visita achegando alimentos non perecedoiros, que serán destinados ao banco de alimentos local a través da colaboración con FESBAL.
O equipo didáctico de Afundación deseñou un proxecto con diferentes actividades, adaptadas aos diferentes tramos de idade, para todos aqueles centros educativos que queiran visitar a exposición cos seus estudantes.
