O voceiro popular no Concello da Gudiña, José María Lago, foi elixido esta mañá deputado provincial despois de ser votado polos edís do PPdeOU dos concellos pertencentes á Xunta Electoral de Zona (XEZ) de Verín.
Deste xeito, José María Lago formará parte da corporación provincial para o mandato 2023-2027 dentro do grupo popular, tomando posesión da súa acta de deputado na sesión de investidura da corporación provincial que se celebrará no mes de xullo.
José María Lago amosou o seu “agradecemento aos compañeiros populares” por ser elixido como deputado por parte da XEZ de Verín, integrada polos concellos de Castrelo do Val, Cualedro, A Gudiña, Laza, A Mezquita, Monterrei, Oímbra, Riós, Trasmiras, Verín e Vilardevós.
“Poder ser deputado provincial no próximo mandato é unha honra e, especialmente, un motivo de enorme responsabilidade”, sinalou Lago, que avanzou a súa motivación de “traballar con todas as gañas do mundo a prol da miña comarca e a miña provincia”.
“Como ten ben demostrado, a Deputación de Ourense é unha potente ferramenta para desenvolver iniciativas transformadoras á vez que colabora cos concellos na blindaxe dos servizos públicos”, remarcou José María Lago, que incidiu na importancia de “seguir avanzando en políticas públicas enfocadas a fixar poboación no rural e dinamizar o territorio, apoiados en fitos e novas ferramentas estratéxicas como o AVE, os nosos recursos endóxenos ou o turismo”.
