A Deputación constitúe a Mesa Xeral de Negociación para os vindeiros catro anos, nos que estarán como representantes do goberno provincial o presidente, Luis Menor; a vicepresidenta primeira, Marta Nóvoa; e os deputados José María Lago e Rosendo Fernández
Os grandes obxectivos de mellora que se fixaron son: planificación estratéxica, coa creación dunha nova RPT en 2025; negociación colectiva, cun novo convenio colectivo; e condicións laborais dos 734 empregados públicos da institución
O presidente provincial sinala que as claves deste proceso serán “o diálogo e a colaboración”. Agradecido á parte sindical pola postura favorable expresada á práctica totalidade da proposta, Luis Menor cre que de alcanzarse os resultados esperados “imos conseguir un gran avance nas condicións laborais e, como resultado, na prestación dos servizos da Deputación”
Ourense, 6 de outubro de 2023.- A Deputación de Ourense vén de constituir a Mesa Xeral de Negociación para o presente mandato 2023-2024, na que estarán integrados como representantes do goberno provincial o presidente, Luis Menor (que exercerá, á súa vez, a Presidencia da Mesa Xeral de Negociación); a vicepresidenta primeira, Marta Nóvoa; así como os deputados José María Lago e Rosendo Fernández.
Precisamente, na reunión constitutiva, o presidente provincial fixo fincapé en que “para alcanzar os obxectivos de modernización e mellora da calidade dos servizos públicos que presta a Deputación, é precisa unha axeitada xestión do principal activo co que conta a Administración: o seu capital humano”. Luis Menor sinalou tamén que as claves deste proceso serán “o diálogo e a colaboración”, amosando tamén o seu agradecemento á parte sindical pola postura favorable á práctica totalidade da proposta do goberno provincial.
O presidente provincial centrou na planificación e a negociación as dúas claves nas que o goberno provincial basea a súa política de recursos humanos para o presente mandato. Neste senso, Luis Menor marcou como obxectivos marcados: a mellora da planificación estratéxica, onde serán fundamentais a Relación de Postos de Traballo (RPT), o Plan de Ordenación de Recursos Humanos e as Ofertas de Emprego Público; a mellora da negociación colectiva, procurando sempre chegar a acordos no marco da mesa xeral de negociación; a mellora dos sistemas de control de presenza, conciliación laboral e familiar, e o teletraballo; e a mellora das condicións laborais dos empregados públicos provinciais, con especial incidencia en aspectos como a seguridade e saúde no traballo, a formación continua, o sistema de carreira profesional, os beneficios sociais e as políticas de igualdade.
Pola súa banda, a vicepresidenta primeira, Marta Nóvoa, analizou os datos actuais da plantilla provincial, que conta cun total de 734 efectivos e abundou nas melloras na planificación estratéxica. Así, avanzou que un dos principais obxectivos marcados é contar cunha nova RPT no ano 2025, totalmente actualizada e adaptada aos cambios lexislativos. Previamente, tamén está prevista unha modificación puntual da actual RPT no vindeiro ano coa fin de corrixir desaxustes. Outros obxectivos marcados son a elaboración dun novo Plan de Ordenación de Recursos Humanos; continuar coa tramitación das convocatorias da OEP 2021 e 2022, así como a probar a Oferta de Emprego Público de 2023; impulsar as bolsas e listas previas de contratación; convocatorias dos procedementos de provisión de postos de traballo (concurso ordinario e específico); a e creación do rexistro de persoal da Deputación.
No que atinxe á mellora das condicións laborais dos empregados públicos provinciais, Marta Nóvoa explicou que se incidirá con especial énfase nas condicións de seguridade e saúde no traballo, poñendo a andar o Comité de Seguridade e Saúde do presente mandato; en negociar no seo da Mesa Xeral de Negociación un sistema de carreira profesional para os empregados provinciais, así como iniciar os estudios precisos para aplicar a avaliación de desempeño; continuar mellorando os beneficios sociais dos traballadores; reforzar todos os mecanismos relativos á formación continua; e, por último, dimensionar as políticas de igualdade, constituíndo para elo o Comité de Seguimento do II Plan de Igualdade da Deputación e establecer un cronograma de actuacións para darlle cumprimento ao devandito plan.
