O conselleiro de Emprego, Comercio e Emigración, José González, visitou en San Amaro o local social da parroquia de Santa María das Neves de Grixoa, reformado para uso da veciñanza a través do obradoiro de emprego dual Arrieiros IV, especializado en traballos forestais e de albanelería e que fai servizo a distintos municipios desta comarca do Carballiño. Alí puxo en valor o papel destes obradoiros na formación teórico-práctica para mellorar a empregabilidade das persoas participantes ao tempo que contribúen a mellorar servizos para a cidadanía nas zonas rurais.
No caso do concello de San Amaro, ademais desta rehabilitación, o obradoiro abarca outras actuacións como a plantación de frondosas na parcela dos Cotos e no concello do Irixo inclúe accións de roza e sinalización no camiño Nós, no campo de fútbol, limpeza e roza de núcleos de poboación e de pistas forestais.
Para o alcalde, esta parroquia é moi activa, e poder contar con este local mellorado e ampliado tamén nos últimos anos, é algo importante. Agora atópase integrada no entorno e ofrecendo unha cara mellorada para o desfrute e uso dos veciños. O vindeiro ano, comprometéronse a reformar o local de Eiras e o que se utiliza como tanatorio en San Amaro.
