Malia subliñar “carencias e eivas” nos Orzamentos 2025, os socialistas abstéñense na votación ao recoller o grupo de goberno o groso das súas demandas
Amais de subir a partida do CooperOU, o PSdeG-PSOE obtivo o compromiso do PP para dotar con 500.000 euros o Plan de vivenda, 250.000 euros para conservatorios e estudar a disolución do Inorde
Os socialistas tamén sacan adiante unha moción para a activación “efectiva e inmediata” do Plan EmergOU fronte ao risco de inundacións na provincia
Ourense, 29 de novembro de 2024. No Pleno de debate dos orzamentos da Deputación de Ourense para 2025, o Grupo Provincial Socialista acadou o compromiso do grupo de goberno para dotar con alomenos tres millóns de euros suplementarios o Plan Provincial de Cooperación ás Obras e Servizos Municipais (CooperOU) na modificación de crédito a realizar no próximo mes de febreiro.
“Malia as carencias e eivas que identificamos na proposta orzamentaria, os socialistas imos ser coherentes e manter a dinámica construtiva e propositiva iniciada neste mandato para chegar a acordos con vistas a mellorar as condicións dos concellos e da veciñanza”, subliñou o voceiro do PSdeG-PSOE na corporación provincial, Álvaro Vila. Logo de constatar a obriga adquirida polo Grupo Popular, xustificaba así Vila a abstención do seu grupo aos orzamentos, que foron aprobados.
Amais dos recursos suplementarios a repartir entre os municipios da provincia segundo criterios obxectivos, durante o debate os socialistas tamén lograron o compromiso do PP para dotar con 500.000 euros o Plan de compra e rehabilitación de vivendas para aluguer ou uso social e 250.000 euros a repartir entre os cinco concellos da provincia con menos de 20.000 habitantes que contan cun conservatorio profesional de música (O Barco de Valdeorras, O Carballiño, Ribadavia, Xinzo de Limia e Verín).
Doutra banda, nas conclusións do debate orzamentario, o presidente da Deputación, Luís Menor, aceptou poñer en marcha un estudo para a integración do Instituto Ourensán de Desenvolvemento Económico (Inorde) no seo da Deputación de Ourense. “Cumprindo así cos puntos de acordo da moción socialista que recibiu o voto favorable da maioría das deputadas e deputados desta corporación no pleno de outubro de 2024”, destacou Vila.
Facer da Deputación un vector de progreso provincial
Na súa exposición de motivos o voceiro socialista foi moi crítico, afirmando que os orzamentos “fan caso omiso da auténtica situación da provincia, caracterizada polo despoboamento, perdendo a provincia uns 40.000 veciños desde o ano 2.000; a falta de servizos e oportunidades, as debilidades estruturais da nosa economía, que depende aínda de sectores tradicionais, así como a falta de innovación e adecuación do tecido produtivo, que carece de investimentos”.
Para os socialistas, os Orzamentos 2025 persisten en “instrumentos e políticas públicas erráticas”, presentando ao Inorde coma “claro expoñente de ineficacia e irracionalidade administrativa e falta de transparencia”. “Non se xustifica a súa utilidade nin gasto e, sen logros susceptibles de razoar a súa mera existencia, a Deputación debe asumir directamente as supostas funcións do Inorde”, explicou Vila.
Segundo este, “á luz destes orzamentos, a Deputación de Ourense non contempla ser motor de cambio, resignándose ao lento esmorecer da provincia, cunha patente a falta de ambición para reverter a tendencia de forma urxente”.
Para Vila, “a corporación provincial ten que asumir un rol protagonista no desenvolvemento de Ourense, cun proxecto claro e ambición de avanzar, que non é o caso á luz dos orzamentos”.
Prevención provincial fronte a inundacións
Co voto favorable dos grupos provinciais, o Grupo Socialista sacou adiante unha iniciativa para a activación “efectiva e inmediata” do Plan EmergOU que, aprobado inicialmente en xaneiro de 2023, pretendía “dar resposta ás necesidades dos concellos afectados por riadas, inundacións e desprendementos causados polas chuvias”.
“O Plan quedou en mera propaganda e, case dous anos despois da súa posta en marcha, a prevención segue a ser unha urxencia na provincia”, subliñou a deputada socialista Elvira Lama. Segundo esta, “con tantas ferramentas ao dispor, a Deputación debe velar polo acaído funcionamento dos mecanismos de información e prevención para evitar males maiores”.
A proposta socialista tamén contempla que a corporación provincial se implique activamente e colabore cos concellos ourensáns de risco “medio-baixo” de inundacións que aínda non dispoñan dun plan de actuación na materia. Na provincia de Ourense uns 7.000 inmobles están construídos en zona inundable, revestindo perigo “medio-baixo” até 13 municipios (A Rúa, Barbadás, Beade, Carballeda de Avia, Cenlle, Leiro, Monterrei, O Barco de Valdeorras, Ribadavia, Verín, Vilamartín de Valdeorras e Xinzo de Limia).
Asemade, a demanda do grupo socialista, o groso do pleno acordou solicitar da Xunta de Galicia a súa “implicación económica e técnica” para a redacción dos Plans de Risco de Inundación Municipal nos concellos ourensáns, así como para o desenvolvemento destes a través da posta en marcha de programas e cursos formativos para o persoal dos distintos niveis de intervención en emerxencias a través da Academia Galega de Seguridade pública.
