O BNG de Cartelle propón unha ordenanza municipal para afrontar o perigo das vivendas abandonadas ou en estado de ruína no municipio

II EDICIÓN COCHES CLÁSICOS NO IRIXO

Manolo Ferro “Cartelle leva anos sufrindo unha perda constante de poboación, especialmente da mocidade, que se ve obrigada a emigrar pola falta de futuro aquí. Isto tradúcese nunha proliferación de casas baleiras, moitas delas en ruínas, que ameazan a seguridade da veciñanza e dan unha imaxe de abandono que frea calquera intento de recuperación”

XUNTANZA DE CLÁSICOS NO IRIXO

Cartelle, 12 de maio de 2025. O BNG de Cartelle, a través do seu portavoz municipal, Manolo Ferro, vén de presentar unha moción dirixida ao pleno da corporación na que reclama medidas urxentes para abordar o grave problema que supoñen as vivendas abandonadas e en estado ruinoso no concello. A iniciativa chega como resposta a unha realidade que se vén agravando nas últimas décadas: o despoboamento progresivo, o envellecemento da poboación e a falta de oportunidades, que derivan nunha paisaxe rural marcada polo abandono e o deterioro.

A proposta nacionalista solicita ao goberno municipal a elaboración dunha ordenanza municipal específica que regule a situación das vivendas en estado de ruína ou con risco evidente de derrube. A intención é establecer un marco legal que permita actuar sobre estas edificacións, garantindo así tanto a seguridade das persoas como a protección do patrimonio urbanístico.

O BNG demanda que esta ordenanza inclúa a obriga para os propietarios de acometer medidas de conservación ou, no seu defecto, accións de seguridade como a sinalización ou o balizamento das zonas afectadas, sempre baixo valoración técnica. Ademais, propóñese a creación dun rexistro municipal de inmobles abandonados ou en ruínas, como ferramenta para planificar actuacións urbanísticas e tomar decisións administrativas e legais.

“Non podemos permitir que a falta de actuación institucional converta os nosos núcleos rurais en espazos perigosos e desolados. É responsabilidade do concello establecer mecanismos claros e así protexamos tanto ás persoas como ao noso patrimonio colectivo”, sinalou Ferro.

A moción tamén contempla o lanzamento de campañas informativas para que a veciñanza coñeza os seus dereitos e deberes respecto das vivendas en mal estado, así como as posibilidades de rehabilitación do patrimonio edificado, fomentando así unha cultura de coidado e recuperación do entorno construído.

Por outra banda, o BNG insta á Xunta de Galiza a colaborar activamente con liñas de axuda específicas destinadas á rehabilitación de vivendas en zonas rurais e á mellora da seguridade estrutural dos inmobles abandonados. A formación nacionalista considera esencial a implicación do Goberno galego nesta tarefa, que require recursos e coordinación entre administracións.”Reverter esta situación require vontade política e planificación. O BNG de Cartelle ofrece propostas concretas para construír un modelo de desenvolvemento sostible, humano e comprometido co futuro dos nosos núcleos rurais”, concluíu Manolo Ferro